पुणे | कोरेगाव भीमा दंगलीच्या वेळी विस्थापित झालेले अशोक आठवले आणि सुरेश सकट यांच्या कुटुंबाचे पुनर्वसन पुणे महानगर पालिकेच्या सदनिकेत करण्यात आले आहे. तसेच याबाबतचे आदेश पुणे महापालिका आयुक्त सौरभ राव यांनी दिले आहेत. रिपब्लिकन पार्टी ऑफ इंडियाचे राष्ट्रीय अध्यक्ष आणि केंद्रीय सामाजिक न्याय राज्यमंत्री रामदास आठवले यांच्या आदेशावरून उपमहापौर डॉ. सिद्धार्थ धेंडे यांनी यासंदर्भात सतत पाठपुरावा केल्यामुळे या कुटुंबाला मदत मिळाली आहे. तसेच ही दोन्ही विस्थापित कुटुंबे एक जूनपासून जिल्हाधिकारी कार्यालयासमोर धरणे आंदोलनाला बसली होती.
दंगलग्रस्तांसमवेत त्यांना घरकुल देण्याचा प्रस्ताव आहे. मात्र, सध्या त्यांना कोणताही निवारा नसल्याने तात्पुरत्या स्वरूपात निवारा उपलब्ध करून देण्याच्या सूचना रामदास आठवले यांनी दिल्या होत्या. त्यानुसार उपमहापौर डॉ. धेंडे यांनी प्रशासनाकडे केलेल्या पाठपुराव्यामुळे पालिकेच्या सदनिकेत त्यांची व्यवस्था करण्यात आली आहे. पालिकेच्या चाळ विभागाकडील कसबा पेठेतील कॉलनी क्रमांक ५ मधील दोन सदनिका या दोन कुटुंबियांना दिल्या आहेत. या सदनिका ११ महिन्यांकरिता आहेत. सदरची दोन्ही कुटुंबे दंगलग्रस्त असल्याने त्यांच्याकडून प्रति महिना एक रुपया इतके भाडे आकारले जाणार असून, वीजबिल सदनिका धारकांनी भरायचे आहे, असे आदेशात नमूद केले आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
