मनसेचे संताप मोर्चाद्वारे शक्तिप्रदर्शन..

मुंबईः एल्फिस्टन रेल्वे स्थानकात झालेल्या चेंगरीचेंगरीनंतर प्रवाशांच्या सुरक्षेचा मुद्दा ऐरणीवर आला आहे. याबाबत रेल्वे प्रशासनाला जाब विचारण्यासाठी मनसे अध्यक्ष राज ठाकरे यांनी गुरुवारी चर्चगेट रेल्वे मुख्यालयावर संताप मोर्चा काढला. या मोर्चात मोठ्या संख्येने कार्यकर्ते, प्रवाशी सहभागी झाले होते. सकाळी अकरा वाजता मोर्चाला सुरुवात झाली. मनसे कार्यकर्त्यांनी विविध रंगाचे पोशाख परिधान केले होते. त्यावर अपघाताला जबाबदार कोण असा प्रश्न उपस्थित करण्यात आला होता. मनसेच्या मोर्चाला परवानगी नाकारण्यात आली आहे, तरी मोठ्या संख्येने मोर्चेकरी चर्चगेटच्या दिशेने रवाना झाले होते. दरम्यान राज ठाकरे स्वतः मोर्चात सहभागी झाले असून त्यांनी चर्चगेट मुख्यालयात धाव घेतली आहे. तेथे त्यांनी रेल्वे अधिकाऱ्यांना प्रवाशांच्या सुरक्षेबाबात प्रश्न उपस्थित केले. दरम्यान, मोर्चामुळे वाहतूक व्यवस्थेत किरकोळ बदल करण्यात आले होते. सध्या चर्चगेट स्थानकात मोठी गर्दी झालेली आहे. यामुळे प्रवाशी ताटकळलेले दिसून आले.

राज ठाकरेंनी रेल्वेच्या सुरक्षेसह रेल्वे विभागाच्या परीक्षा मराठी भाषेत घेण्यासाठी अनेकदा आंदोलने केली आहे. काही ठिकाणी त्यांच्या कार्यकर्त्यांनी परीक्षा उधळून लावल्या आहेत. मराठी माणसांसाठी त्यांचे सतत आंदोलन सुरू असते. परंतु रेल्वे हा विषय त्यांच्या आंदोलनाचा केंद्रबिंदू राहिला आहे. आजही ते रेल्वे विषयावर आक्रमक झाल्याचे दिसत आहे.