कोल्हापूर – मुलीला जन्म दिला, तर घरी नांदविणार नाही, अशी धमकी पती आणि सासरच्यांनी दिल्यामुळे घाबरलेल्या ओल्या बाळंतिणीने एक घृणास्पद कृत्य केले. आपल्या आईच्या साहाय्याने तिने चक्क पोटच्या नवजात मुलीला जिवंत पुरले. कोल्हापुरातीलगडमुडशिंगीत ही हृदयद्रावक घटना घडली.
दरम्यान, याची माहिती मिळताच त्या तान्हुलीला खड्ड्यातून बाहेर काढून रुग्णालयात दाखल करण्यात आले आहे. गांधीनगर पोलिसांनी याप्रकरणी मुलीची आई सारिका लखन मोरे आणि तिची आई नकुशा सिद्राम भोसले या दोघींवर गुन्हा दाखल केला आहे.
सारिकाचा विवाह लखन मोरेशी झाला होती. लखनला पहिल्या पत्नीपासून चार मुली आहेत. मुली झाल्याने नाराज झालेल्या लखनने पहिल्या पत्नीला माहेरी धाडून दिलं होतं. मुलगा हवा असल्याने त्याने सारिकाशी लग्न केलं. मात्र सारिकालाही पहिली मुलगी झाल्याने लखन प्रचंड चिडला होता. यामुळे दुस-यांदाही मुलगी झाली तर तुला नांदवणार नाही, अशी धमकीच त्याने पत्नीला दिली होती.
आईच्या घरी बाळंतपणासाठी आलेली सारिका आणि तिची आई मुलगा जन्माला यावा, यासाठी प्रार्थना करत होत्या. पण पुन्हा मुलगी जन्माला आल्याने त्या घाबरून गेल्या. आणि सारिकाने आपल्या आईच्या मदतीने मुलीला पोत्यात भरुन रेल्वेरुळाजवळ खड्डा खणून त्यात पुरलं. परिसरातील लोकांच्या ही गोष्ट लक्षात आल्यानंतर त्यांनी पोलिसात वर्दी दिली. त्यानंतर पोलिसांनी तातडीने घटनास्थळी पोचून मुलीला बाहेर काढले आणि दोघींविरुद्ध गुन्हे नोंदविले.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
