उल्हासनगर विषारी गॅसच्या गळतीमुळे एका हंगामी कामगाराचा गुदमरुन मृत्यू झाला. तर विषारी गॅस नाका-तोंडात गेल्याने ११ कामगारांना गंभीर अवस्थेत कल्याणच्या खासगी रुग्णालयात दाखल करण्यात आले आहे. ही घटना उल्हासनगर-शहाड परिसरातील सेंच्युरी रेयॉन कंपनीत घडली असून संजय शर्मा (३४) असे गुदमरुन मृत्यू झालेल्या हंगामी कामगाराचे नाव आहे.

उल्हासनगर कॅम्प नंबर १ येथील शहाड परिसरातील सेंच्युरी रेयॉन कंपनीत रात्री ९ वाजताच्या सुमाराला गॅसच्या पाईपलाईनच्या दुरुस्तीचे काम सुरू होते. त्याच सुमाराला एका गॅसच्या पाईपलाईनमधून विषारी गॅसची अचानक गळती सुरू झाली. यावेळी कुठल्याही प्रकारची कंपनीच्या वतीने कामगारांना सुरक्षा पुरविण्यात आली नसल्याचा आरोप कामगार व त्यांच्या नातेवाईकांनी केला आहे. त्यामुळे हंगामी कामगार संजय शर्मा यांचा गुदमरुन जागीच मृत्यू झाला असून ११ कामगारांना कल्याणच्या एका खासगी रुग्णालयात गंभीर अवस्थेत उपचारासाठी दाखल करण्यात आले आहे.

दरम्यान यापूर्वीही अनेक कामगारांनी विषारी गॅस गळतीमुळे आपले प्राण गमावले आहेत. मात्र या कंपनीत आजही हंगामी कामगारांना राबवून त्यांच्या सुरक्षेतेकडे जाणीवपूर्वक दुर्लक्ष करीत असल्याचे आजच्या घटनेवरुन समोर आले आहे. घटनेची माहिती मिळताच गॅस गळती रोखणाऱ्या पथकासह अग्निशमन दल व पोलीस घटनास्थळी दाखल झाले. त्यांनी परिस्थिती नियंत्रणात आणली. मात्र संजय शर्मा या हंगामी कामगाराचा गुदमरुन मृत्यू झाल्याने कंपनीच्या आवारात काही काळ तणावाचे वातावरण निर्माण झाले होते. तर कंपनीच्या ठेकेदाराच्या माहितीनुसार त्याला चार दिवसाचे काम एका दिवसात पूर्ण करण्याचे सांगितल्याची माहिती समोर आली आहे. यामुळे ही घटना घडल्याचा आरोप कामगारांनी केला आहे.