बीड | गेल्या काही दिवसांपासून मराठा आरक्षणाच्या मागणीवर संपूर्ण महाराष्ट्र पेटताना दिसत आहे. मराठा आरक्षणाच्या मागणीसाठी बीड जिल्ह्यातील अभिजित देशमुख (वय ३५ वर्ष) या तरुणाने गळफास घेऊन आत्महत्या केली आहे. देशमुख यांनी मंगळवारी सकाळी घराजवळील एका झाडाला गळफास घेऊन आत्महत्या केली आहे.
अभिजित यांच्या खिशात चिट्ठी सापडली असून यात मराठा आरक्षण, बँकेचे कर्ज आणि औषधांचा खर्च या कारणांमुळे त्यांनी आत्महत्या करत असल्याचे म्हटले आहे. तसेच अभिजित यांनी स्वत: लिहिले आहे का? याचा तपास पोलीस करत आहे.अभिजित देशमुखने विज्ञान विषयातून पदव्युत्तर पदवी शिक्षण घेतले होते. परंतु अभिजितला नोकरी नसल्याने तो अस्वस्थ होता. मराठा समाजाला आरक्षण नसल्यामुळे नोकरी नाही. तसेच त्यांच्या कुटुंबीयांवर बँकेचे कर्ज देखील होते. त्यामुळे व्यवसाय देखील करू शकत नाही. अभिजितने मित्रांकडे अशी खंत व्यक्त केली होती.
मराठा आरक्षणासाठी याआधी औरंगाबादमध्ये गोदावरी नदी पात्रात उडी मारुन काकासाहेब शिंदे या तरुणाने आत्महत्या केली होती. तर, औरंगाबादमध्ये गंगापूर तालुक्यातील देवगाव रंगारी येथील जगन्नाथ सोनावणे यांनी विष प्राशन केले असून उपचारादरम्यान त्यांचा २५ जुलैला मृत्यू झाला. २९ जुलै रोजी नांदेड मधील कचरु दिगंबर कल्याणे या तरुणाने गळफास लावून आत्महत्या केली. तर ३० जुलै रोजी मराठा आरक्षणाच्या मागणीसाठी औरंगाबादमधील अणखी एका तरुण प्रमोद होरे पाटील यांनी फेसबुकवर पोस्ट टाकून आत्महत्या केली.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
