बँकॉक | थायलंडमधील गुहेमध्ये २४ जूनपासून आडकलेल्या १२ फुटबॉल खेळाडूसह त्यांच्या प्रशिक्षकाला सुखरुप बाहेर काढण्यात यश आले आहे. या मुलांना वाचविण्यासाठी महाराष्ट्राने अमुल्य योगदान दिले होते. ही मुले टॅम लूंग या गुहेत अडकली होती. मुलांना बाहेर काढण्यासाठी महाराष्ट्रातील किर्लोस्कर कंपनीचे ‘फ्लड पंप्स’ पाठवण्यात आले होते. मुलांना वाचविण्यासाठी थायलंड सरकाराने भारतासह अमेरिका, इस्रायल जगभरातील अनेक देशांची देखील मदत घेण्यात आली होती.

या मुलांना बाहेर काढण्यासाठी गुहेतील पाण्याची पातळी कमी करणे अत्यंत आवश्यक होते. त्यामुळे थायलंड सरकारने भारत सरकारला विनंती करून किर्लोस्कर ब्रदर्स (केबीएल) फ्लड पंप्स पाठवण्यास सांगितले. या रेस्क्यू ऑपरेशनसाठी किर्लोस्कर यांचे डिझाईन इंजिनिअर असलेले सांगलीतील मिरजचे प्रसाद कुलकर्णी यांची टीम शुक्रवारी रात्री तातडीने रवाना केली. थायलंडला पोहोचताना या टीमने कामास सुरुवात केली आणि फ्लड पंप्स सुरू केले. या पंप्साचा वापर करून पाण्याचा उपसा केल्यामुळे गुहेतील बचाव कार्याला गती आली. यामुळे १२ फुटबॉल खेळाडूसह त्यांच्या प्रशिक्षकाला बाहेर काढण्यात यश आले.

मुले गुहेत कशी अडकली

थायलंडमधील एका शाळेतील १२ मुले फुटबॉल खेळल्यानंतर आपल्या प्रशिक्षकाबरोबर २३ जूनला ‘टॅम लूंग’ ही गुहा पाहण्यासाठी गेले होते. परंतु गुहेत पुराचे पाणी आल्याने ही सर्व मुले तिथेच अडकून पडली. त्यानंतर नॅशनल पार्कच्या कर्मचाऱ्यांना गुहे बाहेर सायकल आणि खेळाचे काही साहित्य दिसले. याबाबत कर्मचाऱ्यांनी स्थानिक फुटबॉल क्लबशी संपर्क साधल्यानंतर १२ लहामुले आणि त्यांचा प्रशिक्षक गुहेत अडकले असल्याचे समोर आले.