मुंबई, आज जे संविधान बचाव रॅली काढत आहेत, त्यांचे हात कमला मॉलसाठी मिल कामगारांच्या जमिनी देण्यासाठी अतिशय वेगाने सरसावले होते. पण, तेच हात भारतरत्न डॉ. बाबासाहेब आंबेडकर यांच्या स्मारकासाठी इंदूमिलची जागा देताना अचानक कसे मंदावतात, हेही या महाराष्ट्राने गेली 15 वर्ष अनुभवले आहे, अशी जोरदार टीका आज मुख्यमंत्री श्री देवेंद्र फडणवीस यांनी आज केली.
भाजपाच्या अतिभव्य तिरंगा एकता रॅलीच्या निमित्ताने कामगारमैदानावरील जाहीर सभेत ते बोलत होते. यावेळी बोलताना ते म्हणाले की, संविधान स्वत:च सक्षम आहे, त्याला तुम्ही काय वाचविणार? मुळात दुरूपयोग करता येईल, इतके संविधान कच्चे नाही. सत्तेत असताना याच संविधानाची शपथ घ्यायची आणि भ्रष्टाचार करायचा आणि विरोधात बसले की स्वत:चे पक्ष वाचविण्यासाठी याच पवित्र संविधानाचा आसरा घ्यायचा. राजकारण हे इतक्या नीच पातळीचे नसावे. ज्या ज्या वेळी संविधानावर आघात करण्याचे प्रयत्न झाले, तेव्हा तेव्हा संविधानानेच त्यांना दंडित केले. इंदिरा गांधींच्या आणिबाणीचे उदाहरण अजूनही लोक विसरले नाहीत.
आज ज्यांनी संविधान बचाव रॅलीचे आयोजन केले, त्यासाठी 18 पक्ष एकत्र आले. पण, ते केवळ 1800 लोक जमवू शकले आणि एकट्या भाजपाने जेव्हा तिरंग्याचा सन्मान करण्यासाठी लोकांना आवाहन केले, तेव्हा कामगारमैदान पहा कसे गच्च भरले आहे, हेही मुख्यमंत्र्यांनी यावेळी आवर्जून सांगितले. संविधानाचा सन्मान खर्‍या अर्थाने करायचा असेल तर तो शेवटच्या घटकाच्या उन्नतीत आहे. गरिबांना घरे, महिलांना स्वयंपाकाचा गॅस, युवकांना मुद्रा कर्ज हे सारे काही पंतप्रधान नरेंद्र मोदी यांच्या सरकारमुळे घडत आहे. संविधान हा आमचा धर्म आहे. आम्ही सत्ता उपभोगायला सरकारमध्ये नाही तर सेवा करण्यासाठी आहोत, असेही मुख्यमंत्र्यांनी यावेळी सांगितले.
दरम्यान, आज राज्यभरात सुमारे 3000 वर ठिकाणी भाजपाच्या कार्यकर्त्यांनी तिरंगा एकता यात्रांचे आयोजन केले होते, या सर्व ठिकाणी प्रचंड प्रतिसाद लोकांनी दिला.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
