मुंबई | पंतप्रधान नरेंद्र मोदी यांच्या हस्ते आज (१८ डिसेंबर) कल्याण मेट्रो प्रकल्पांचे भूमिपूजन करण्यात आले आहे. सोहळ्यात संबोधित करत असताना पंतप्रधान नरेंद्र मोदींनी मुंबई शहराच्या पायाभूत सुविधांवर असलेल्या ताणाबाबत भाष्य केले आहे. “आज मुंबईचा विस्तार होत आहे. चहू दिशांनी विकास होत आहे. परंतु, त्याचबरोबर येथील पायाभूत सोयी-सुविधांवरील ताण देखील मोठ्या प्रमाणावर वाढला आहे. विशेषतः येथील वाहतूक यंत्रणा, रस्ते आणि लोकल रेल्वे यंत्रणेवर अधिक ताण आहे”, असेही पंतप्रधान मोदी यांनी यावेळी म्हटले.

कल्याण मेट्रो प्रकल्पाच्या भूमिपूजना व्यतिरिक्त पंतप्रधान नरेंद्र मोदींनी त्यांच्या या एक दिवसीय महाराष्ट्र दौऱ्यात जवळपास ४१,००० कोटींच्या गृहनिर्माण आणि पायाभूत सुविधांच्या संदर्भातील योजनांचा शुभारंभ केला आहे. यामध्ये प्रधानमंत्री आवास योजनेअंतर्गत १८,००० कोटी रुपये खर्चून ८९,७७१ इतकी घरे बांधण्यात आली आहेत.

दरम्यान, या मेट्रो भूमिपूजन सोहळ्यात मुंबई मेट्रो प्रकल्पावरून काँग्रेसवर तोफ डागली आहे. मुंबई मेट्रो प्रकल्पासाठी काँग्रेस सरकारने खूप वेळ लावला, असा आरोप मोदींनी यावेळी केला आहे.