मुंबई | अंधेरी- विलेपार्ले दरम्यान असलेल्या पादचारी गोखले पुलाचा काही भाग मंगळवारी सकाळी कोसळताच परीसरातील रिक्षाचालकांनी नेहमीप्रमाणे संधीचा फायदा घेतला. वेस्टर्न रेल्वे ठप्प झाल्याने अनेकांना कार्यलयात पोहचण्यासाठी अडचणींचा सामना करावा लागला. अनेकांनी कार्यलय गाठण्याची धावपळ केल्याने रिक्षावाल्यांनी सुद्धा हात धुवायला सुरुवात केल्याचे चित्र पहायला मिळाले. अंधेरी ते बांद्रा हे अंतर केवळ 150 रुपयात सहज गाठता येते परंतु प्रवाशांची अडचण लक्षात येताच रिक्षावाल्यांनी शेअरिंग स्वरूपात प्रत्येक प्रवाशांकडून 100 रुपये घ्यायला सुरुवात केली होती. त्यामुळे जो प्रवास 150 रुपयांपर्यंत होतो त्याचसाठी आज रिक्षावाल्यांनी 300 रुपयांची मागणी करत प्रवाशांची लूट केली.

प्रसंगी दुसरा पर्यायच उपलब्ध नसल्यामुळे अनेकांनी ऑफिसला लवकर पोहचण्याच्या आशेने वाट्टेल ती किंमत मोजल्याचे दिसून आले. ज्या शहरांवर आणि प्रवाशांवर रिक्षावाल्यांचे घर चालत तोच मुंबईकर जेव्हा घराबाहेर पडून प्रवासाला निघतो तेव्हा प्रवासादरम्यान एखाद संकट याच प्रवाशांवर येते तेव्हा हेच रिक्षाचालक त्याला संधी समजून अधिक पैसे उकळतात हा दरवेळचा मुंबईकरांचा अनुभव आहे. त्यामुळे शहरात अगदी हाताच्या बोटावर मोजण्याइतकेच प्रामाणिक रिक्षाचालक राहिले आहेत की काय असा प्रश्न उपस्थित होत आहे.