मुंबई | अंघोळीची गोळी या उपक्रमाच्या माध्यमाने पाणी बचतीचा संदेश देणारी मुंबईतील तरुण मंडळी जागोजागी पाणी वाचवण्याचे आवाहन करत असते. प्रेम, त्याग, बंधुभाव, बचत ह्या चार तत्वांवर अंघोळीची गोळी उभारलेली आहे. पाणी वाचवण्याचे ध्येय उराशी बाळगुन अंघोळीची गोळी टीम मुंबई ही तरुण मंडळी शाळा, महाविद्यालये तसेच खेडोपाडी जाऊन लोकांना पाण्याचे महत्व पटवून देत असते. ह्याच अंघोळीच्या गोळीच्या टीमने नुकतेच मुंबई मधील विविध शहर परिसरात झाडांवरील खिळे काढण्याचा सुत्य उपक्रम टाटा पॉवरच्या मदतीने पार पाडला आहे.
झाडांनाही संवेदना असतात तेही सजीव आहेत पण फक्त त्यांना बोलता येत नाही त्यामुळे ते व्यक्त होऊ शकत नाहीत. परंतु त्यांच्या वेदना आम्हांला ऐकू येत आहेत आणि त्यामुळे त्यांच्या वेदना कमी करण्याचा आमचा प्रयत्न आहे, असे सांगत खिळेमुक्त झाडाच्या संकल्पनेचा उदय पुण्यात सर्वात प्रथम झाला आणि त्यातून प्रेरित होऊन मुंबई टीमने हा उपक्रम पहिल्यांदा दादर येथे राबवला. याच युवकांनी एकत्र येऊन मुंबईत विविध शहरांत झाडांवरील खिळे काढण्याचा प्रयत्न केला.
हा उपक्रम थोड्या काळापुरता मर्यादित नसून मुंबईतील विविध भागात तरुणांनी व नागरिकांनी एकत्रित अशा प्रकारचे उपक्रम राबवावे, असे आवाहन अंघोळीची गोळी टीमने यावेळी केले आहे. पुण्याच्या माधव पाटील या तरूणाने सुरु केलेली खिळेमुक्त झाडे मोहीम ठाणे आणि मुंबई परिसरात विस्तारण्यासाठी अंघोळीची गोळी टीम मुंबई प्रयत्न करत आहे आणि पर्यावरण संवर्धनाच्या या चळवळीत अनेक सामाजिक संस्थांची मदत या युवकांना मिळत आहे. नुकतेच टाटा पॉवरच्य मदतीने चेंबूर स्टेशन ते डॉ. आंबेडकर गार्डन, डायमंड गार्डन ते क्यूबिक मॉल, आजाद बाग ते वाशी नाका आणि डायमंड गार्डन ते छत्रपती शिवाजी महाराज पुतळा या परिसरात खिळेमुक्त झाडे ही मोहीम राबविण्यात आली आहे.
खिळेमुक्त झाडे मोहिमेचे मुंबई जिल्हा समन्वयक तुषार वारंग आणि अंघोळीची गोळी संस्थेच्या सदस्य विधी गोलटकर यांनी या संपुर्ण मोहिमेच्या समन्वयाचे काम पाहिले. यापुढील काळात अनेक शहरांत खिळेमुक्त, पोस्टरमुक्त, बॅनरमुक्त आणि आळेयुक्त झाडे ही मोहीम अधिक व्यापक करण्यासाठी आम्ही प्रयत्न करणार आहोत असे यावेळी तुषार वारंग यांनी सांगितले. टाटा पॉवरचे अनिल जैन, शिरीष कामत, हिरेन चव्हाण, नरेश पाटील, अंजली वजीर, सुरेश झोपे, गणेश सोडे यांनी या मोहिमेत नागरिकांना या मोहिमेची गरज आणि आजच्या काळातील उपयुक्तता समजावुन सांगण्यासाठी प्रयत्न केले.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
