नवी मुंबईत कुत्रे होतायत निळे!

नवी मुंबई – तुम्ही आतापर्यंत तांबडे, काळे, पांढरे अशा अनेक रंगाचे कुत्रे पाहिले असतील, पण निळे कुत्रे तुमच्या पाहण्यात कधीच आले नसतील. नवी मुंबईत मात्र हल्ली निळ्याशार रंगाचे कुत्रे पाहायला मिळत आहेत. पण हा निळा रंग धोक्याची सूचना देणारा आहे. याकडे वेळीच लक्ष न दिल्यास येथील मनुष्य जीवन धोक्यात येऊ शकते.

नवी मुंबईतील तळोजा औद्योगिक वसाहतीत सध्या असे निळे पडलेले भटके कुत्रे दिसत आहेत. मात्र हा काही चमत्कार नसून, येथील कंपन्यांनी दूषित पाणी जवळच्या नदी, ओढ्यांत सोडल्याचा तो परिणाम आहे. खरंतर रासायनिक कंपन्यांना सांडपाणी नदीत सोडताना त्यावर प्रक्रिया करणे बंधनकारक आहे. पण शासनाचा हा नियम धाब्यावर बसवून येथील कंपन्या जसेच्या तसे रासायनिक पाणी नदी नाल्यांत सोडत आहेत. त्याचा विपरीत परिणाम येथील जीव साखळीवर होत आहे.

दूषित पाण्यामुळे नदीतील जीव तर धोक्यात आले आहेतच. पण त्याबरोबरच नदी ओढ्यात खाणे शोधत जाणारे कुत्रे देखील त्यामुळे निळे पडत आहेत. कुत्रांच्या आरोग्यवर या दूषित पाण्याचा परिणाम होत आहे. तसेच त्यांच्या माध्यमातून परिसरात रोगराई पसरण्याची शक्यता आहे. तसेच या दूषित पाण्याचा येथील मानवी आरोग्यावरही वाईट परिणाम होण्याची शक्यता पर्यावरण अभ्यासकांनी वर्तविली आहे. त्यामुळे यावर तातडीने उपाययोजना करण्याची मागणी स्थानिकांकडून होत आहे.