माई आंबेडकर सभागृहाचे रामदास आठवलेंच्या हस्ते उदघाटन

मुंबई | सांताक्रूझ पूर्व कालिना येथील भीमछाया सांस्कृतिक केंद्र येथे दिवंगत डॉ. माई आंबेडकर यांच्या स्मृतिप्रीत्यर्थ सभागृहाचे आणि जीवक रुग्ण सेवा प्रशिक्षण केंद्राचे उदघाटन रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांच्या हस्ते नुकतेच करण्यात आले. यावेळी रिपब्लिकन पक्षाचे मुंबई अध्यक्ष गौतम सोनवणे; जिल्हा अध्यक्ष विवेक पवार ;जिल्हा अध्यक्ष सिद्धार्थ कासारे; भीम छाया सांस्कृतिक केंद्राचे अध्यक्ष प्रकाश मोरे ; तसेच पत्रकार हेमंत रणपिसे आदी मान्यवर उपस्थित होते.

दिवंगत डॉ माई आंबेडकर यांना महामानव डॉ बाबासाहेब आंबेडकर यांचा अभिमान कायम होता. महापरिनिर्वाणानंतरही डॉ बाबासाहेब अमर असल्याचे सांगत माई या कुंकू लावीत असत. मात्र त्याकाळात डॉ माईंवर आरोपबाजी करून त्यांच्यावर अन्याय करण्यात आला होता. मात्र दलित पँथर च्या चळवळीने डॉ माई आंबेडकर यांच्यावरील अन्याय दूर केला.

पँथर नेते विचारवंत राजा ढाले यांनी अभ्यास करून डॉ माई आंबेडकरांवर झालेले आरोप चुकीचे असल्याची भूमिका मांडली होती. डॉ माई आंबेडकरांना काही वाईट करायचे असते तर त्यांनी डॉ बाबासाहेब आंबेडकरांनी बौद्ध धम्माची दीक्षा घेण्यापूर्वीच केले असते मात्र त्यांनी तसे केले नाही. डॉ माई आंबेडकरांनी महामानव डॉ बाबासाहेब आंबेडकरांची मनोभावे सेवा केली होती असे प्रतिपादन रामदास आठवलेंनी यावेळी बोलताना केले.