वॉशिंग्टन | ‘अमेरिकेने चीनवरील लष्‍करी विमान खरेदी संबंधीची बंदी उठवून आपली चूक सुधारावी,’ अशी सूचना वजा धमकी चीनने अमेरिकेला दिली आहे. गेल्‍या काही दिवसांपासून अमेरिका आणि चीनमध्ये व्यापार संघर्ष सुरु आहे. दोन्ही देशांच्या बिघडलेल्‍या संबंधामुळे आंतरराष्‍ट्रीय बाजारपेठेवरही मोठा परिणाम झाला आहे. त्यामुळे आता पुन्हा या दोन्ही देशांतील व्यापार संघर्ष चिघळण्याची चिन्हे दिसत आहेत.

अमेरिकेच्या गृहमंत्रालयाने सांगितल्याप्रमाणे, चीनने मोठ्या प्रमाणात केलेल्या क्षेपणास्त्रांच्या खरेदीमुळे चीनवर निर्बंध घालण्यात आले आहेत. अमेरिकेच्या या बंदीमुळे चीनला अमेरिकेच्या अधिकारक्षेत्रात परवान्यासाठी अर्ज करता येणार नाही. काहीच दिवसांपूर्वी अमेरिकेचे अध्यक्ष डोनाल्ड ट्रम्प प्रशासनाने बिघडलेल्या व्यापार संबंधावर तोडगा काढण्यासाठी चीनसमोर चर्चेसाठी पुढाकार घेतला होता. “दोन्ही देशांदरम्यान द्विपक्षीय चर्चा होत आहे. व्यापार संघर्ष हा दोन्ही देशांसाठी फायद्याचा नाही,” असे चीनचे वाणिज्यमंत्री गांव फेंग यांनी म्हटले होते.

अमेरिका आणि चीनमध्ये आरोप-प्रत्यारोपांच्या फैरी झडत आहेत. एकीकडे अमेरिकेने आंतराष्‍ट्रीय संबंधाच्या प्राथमिक मुल्‍यांचे उल्‍लंघन केले असल्याचा आरोप चीनच्या परराष्‍ट्र मंत्रालयाचे प्रवक्‍ते शुआंग यांनी केला आहे. तर दुसरीकडे ‘चीनने अमेरिकेच्या कायद्याचे उल्‍लंघन करून रशियाच्या शस्‍त्रास्‍त्र कंपनीबरोबर सौदा केला असल्याचा पलटवार अमेरिकेने केला आहे.