मुंबई – शिवसेनेशी युतीबाबत प्रयत्न, चर्चा सुरू असली तरी भाजपाकडून पर्यायी रणनीतीही तयार करण्यात आली आहे. त्यानुसार मुंबईतील २२७ जागांसाठी ५१३ उमेदवारांची यादी तयारही करण्यात आली आहे. शुक्रवारी रात्री उशिरापर्यंत चाललेल्या भाजपा निवडणूक समिती बैठकीत हा निर्णय झाल्याचे समजते.
मुंबईतील २२७ वॉर्डांमधून उमेदवारीसाठी भाजपाकडे तब्बल २५०० इच्छुकांनी अर्ज केले होते. यापैकी ५१३ जणांची ही यादी निवडणूक समितीने केली आहे. आता ही यादी मुंबई अध्यक्ष आशिष शेलार यांच्याकडे पाठविण्यात आली आहे. आशिष शेलार यांच्या अध्यक्षतेखालील या निवडणुक समितीत २९ सदस्य आहेत. या समितीने सलग तीन दिवस २० तास मॅरेथॉन चर्चा केल्यानंतर या यादीला अंतिम स्वरूप देण्यात आले आहे. आता शेलार या ५१३ जणांतून अंतिम उमेदवार निवडून ही नावे मुख्यमंत्र्यांपुढे सादर करतील. भाजपच्या दाव्यानुसार त्यांच्याकडे प्रत्येक वॉर्डात दोन ते तीन तगडे उमेदवार आहेत. त्यामुळे आता शिवसेना काय भूमिका घेणार याकडे सगळ्यांचे लक्ष लागले आहे. शिवसेना-भाजप युतीसाठीच्या चर्चेच्या पहिल्या काही फेऱ्यांनंतर दोन्ही पक्षांतील नेत्यांच्या बेताल वक्तव्याच्या मुद्द्यामुळे ही चर्चा फिस्कटली होती. शिवसेनेला सोमय्या व शेलार यांच्या वक्तव्यांवर आक्षेप असून भाजपला अनिल परब व खासदार संजय राऊत यांच्या टीकाटिप्पणीबद्दल राग आहे. भाजप नेत्यांच्या आरोपांच्या फैरी सुरु असेपर्यंत युतीची चर्चा सुरु न करण्याचा आणि नोटाबंदीविरोधात पंतप्रधान नरेंद्र मोदी व केंद्र सरकारविरोधात भूमिका मांडत राहण्याचे शिवसेनेने ठरविले आहे. पक्षप्रमुख उद्धव ठाकरे व मुख्यमंत्री फडणवीस यांच्यातील चर्चेनंतरच तिढा सुटण्याची शक्यता आहे. मात्र, काहीवेळापूर्वीच दोन्ही पक्षांकडून चर्चेसाठी पुन्हा तयारी दर्शविण्यात आली आहे. शिवसेना खासदार अनिल देसाई आणि भाजप नेते विनोद तावडे यांनी एकमेकांशी दूरध्वनीवरून चर्चा केली. त्यानंतर युतीची चर्चा पुन्हा सुरू करण्याचा निर्णय घेण्यात आल्याचे सूत्रांनी सांगितले.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
