मुंबई | अनेक मराठी चित्रपटांमध्ये रोमँटिक भूमिका केलेले. सत्तर, ऐंशी आणि नव्वदीच्या दशकात मराठी सिनेसृष्टीत आपल्या नावाचा ठसा उमटवलेले ज्येष्ठ अभिनेते अशोक सराफ आपल्या आगामी ‘हृदयात समथिंग समथिंग’ सिनेमात लव्हगुरूच्या भूमिकेत प्रेक्षकांच्या भेटीला येणार आहेत. ‘हृदयात समथिंग समथिंग’ चित्रपटातल्या अशोक सराफ ह्यांच्या भूमिकेचे नुकतेच पोस्टर लाँच झाले आहे.

पिरॅमीड फिल्म्स हाऊस प्रस्तुत विनोदकुमार जैन, शैलेंद्र पारख, स्वप्नील चव्हाण, आणि अतुल गुगळे ह्यांची निर्मिती असलेला प्रवीण राजा कारळे दिग्दर्शित ‘हृदयात समथिंग समथिंग’ चित्रपटात अनिकेत विश्वासराव, स्नेहा चव्हाण, प्रियंका यादव, भूषण कडू आणि अशोक सराफ ह्यांच्या प्रमुख भूमिका आहेत.

अशोक सराफ ह्यांच्या भूमिकेविषयी चित्रपटाचे निर्माते विनोदकुमार जैन म्हणतात, “अशोक सराफ ह्यांची ओळख कॉमेडीचा बादशाह आहे. जवळजवळ तीन दशक आपण मराठी सिनेमांतून त्यांचा रोमँसही पाहत आलोय. अशावेळी कॉमेडी आणि रोमँस दोन्हीचे गुरू असलेल्या अशोक सराफ ह्यांना ह्या मॅड कॉमेडी सिनेमातून ‘लव्ह गुरू’च्या भूमिकेत पाहणं प्रेक्षकांना नक्कीच आवडेल असं आम्हांला वाटते.” तसेच हा सिनेमा ५ ऑक्टोबर २०१८ रोजी प्रदर्शित होणार आहे.