कपडे बदलताय, जरा सावधान, छुप्या कॅमेरांची असते तुमच्यावर नजर

वृत्तसंस्थाः शॉपिंग मॉलमध्ये छुप्या पद्धतीने कॅमेरे बसवलेले असल्याचे अनेकदा उघडकीस आले आहे. परंतु कॅमेरे कुठे व कसे बसवलेले असतात, याचा कुणालाही थांगपत्ता लागत नाही. काही महिन्यांपूर्वी केंद्रीय वस्त्रोद्योग मंत्री स्मृती इराणी यांनाही याच अनुभवातून जावे लागले होते. एका नामांकित ब्रँडच्या दुकानात महिलांच्या चेंजिंग रुममध्ये छुपा कॅमेरा बसवला असल्याची पोलखोल त्यांनी केली होती. आरशाच्या मागे, सिलिंगमध्ये, स्मोक डिटेक्टर अशा अनेक ठिकाणी स्पाय कॅमेरे बसवले जातात.

आता नव्या प्रकारचा स्पाय कॅमेरा बाजारात आला असून, तो भारतीय बाजारपेठेत विक्रीसाठी सहज उपलब्ध झाला आहे. दिसायला हा कॅमेरा एका हुकसारखा दिसतो, त्यामुळे कोणालाही शंका येत नाही. हुकमध्ये एचडी कॅमेरा बसवलेला असतो, या कॅमेरात सगळं रेकॉर्ड होऊ शकतं. या कॅमेऱ्याची किंमत १ ते ५ हजारांच्या आसपास आहे. फक्त हुकच्या आकारातच नाही तर स्विच बोर्डच्या आकारातही स्पाय कॅमेरा बाजारात उपलब्ध आहेत. सुरक्षेसाठी याचा वापर व्हावा या उद्देशाने ते तयार करण्यात आले आहेत. पण काहीजण याचा गैरवापर करताना दिसत आहेत.