नवी दिल्ली | निवडणूक आयोगाने कर्नाटक विधानसभा निवडणूक १२ मे रोजी मतदान, तर १५ मे रोजी मतमोजणी होणार असल्याचे जाहीर केले आहे. या निवडणुकाच्या तारखा निवडणूक आयोगाने जाहीर करण्याआधीच भाजपच्या आयटी सेलचे प्रमुख अमित मालवीय यांनी त्यांच्या अधिकृत ट्विट हँडलवरुन तारखा जाहीर केल्या.

अमित मालवीय यांनी ’१२ मे रोजी मतदान तर १८ मे रोजी मतमोजणी’ होईल, असे ट्विट त्यांनी केले होते. मात्र त्यांनी निवडणुकीच्या तारखा जाहीर केल्यानंतर काहीक्षणातच निवडणूक आयोगाने तारखा जाहीर केल्या. निवडणूक आयोगानुसार १२ मे रोजी मतदान तर १५ मे रोजी मतमोजणी होणार असल्याचे पत्रकार परिषदेत सांगितले.

निवडणूक आयोगाकडून तारखा जाहीर होण्याआधीच भाजपने ट्विट केल्यामुळे अमित मालवीय यांना ट्विटरवर ट्रोल केले गेले. त्यानंतर अमित मालवीय यांनी टाइम्स नाऊ चॅनेल पाहून ट्विट केल्याचे स्पष्टीकरण ट्विटरवरुन दिले.

• निवडणूक आयोगाकडून चौकशीचे आश्वासन

निवडणूक आयोगाने निवडणुकीच्या तारखा जाहीर होण्याआधी भाजपा कसे काय निवडणुकीच्या तारखा जाहीर करु शकते. असा सवाल पत्रकारांनी मुख्य निवडणूक आयुक्त ओमप्रकाश रावत यांना विचारला. या प्रकरणाची चौकशी करुन योग्यती कारवाई करण्याचे आश्वासन ओमप्रकाश रावत यांनी पत्रकारांना दिले.