मुंबई | काश्मीर खोऱ्यात दहशतवाद्यांची घुसखोरी रोखताना भारतीय लष्करातील मेजर कौस्तुभ प्रकाश राणे हे शहीद झाले. शहीद मेजर कौस्तुभ यांच्यावर आज लष्करी इतमामात आज दुपारी बाराच्या सुमारास अंत्यसंस्कार करण्यात आले. ठाणेच्या मिरारोड येथील नागरिकांनी कौस्तुभ यांच्या अंत्यदर्शनासाठी मोठी गर्दी केली होती.

ठाण्याचे पालकमंत्री एकनाथ शिंदे, सिंधुदुर्गचे पालकमंत्री दीपक केसरकर आणि राज्याचे शालेय शिक्षण मंत्री विनोद तावडे कौस्तुभ यांच्या पार्थिवाचे अंत्यदर्शन घेऊन राणे कुटुंबीयांचे सांत्वन केले. सोमवारी रात्री काश्मीरच्या गुरेज सेक्टरमध्ये घुसखोर दहशतवाद्यांशी लढताना चार जवानांना वीरमरण आले होते. यात मीरा रोडच्या शीतल नगर भागात राहणाऱ्या २९ वर्षांच्या मेजर कौस्तुभ प्रकाश राणे यांचाही समावेश आहे.

मेजर राणे यांच्या मातोश्री ज्योती, पत्नी कनिका, मुलगा अगस्त्य, बहिण कश्यपी यांनी स्मशानभूमीत अखेरची श्रध्दांजली वाहिली त्यावेळी भावनाविवश नागरिकांनी “भारतमाता की जय, माँ तुझे सलाम अशा जोरदार घोषणा दिल्या. यावेळी लष्कराच्या वतीने बंदुकीच्या फैरी झाडून मानवंदना देण्यात आली.