मुंबई | दिवंगत पंतप्रधान राजीव गांधी यांच्या हत्याकांडा प्रमाणेच पंतप्रधान नरेंद्र मोदी यांची हत्या करण्याचे षडयंत्र रचले जात असल्याचा धक्कादायक ई मेल पोलीस यंत्रणेला मिळाला आहे. याबाबतचे वृत्त कळताच असे षडयंत्र रचणाऱ्या हिंसक देशविघातक प्रवृत्तीचा तीव्र धिक्कार निषेध रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी केला आहे.

पंतप्रधान नरेंद्र मोदी हे डॉ बाबासाहेब आंबेडकर यांच्या संविधानानुसार देशाचा कारभार करीत असून सबका साथ सबका विकास हे सूत्र घेऊन ते संविधानातील भारत साकार करत आहेत. त्यांच्यावर कोणत्याही एका धर्माला ताकद देत असल्याचा आरोप चुकीचा असून त्यांच्याविरुद्ध आत्मघातकी हल्ला करण्याचे षडयंत्र रचणाऱ्या देशविघातक शक्तींचा आपण तीव्र निषेध करीत आहोत. अश्या खुनी हल्ल्यांच्या धमक्यांना प्रधानमंत्री बळी पडणार नाहीत. आत्मघातकी हल्ल्यात प्रधानमंत्री नरेंद्र मोदींना संपविण्याचे कारस्थान रचणाऱ्या शक्तींना जनता माफ करणार नाही असे रामदास आठवले यांनी म्हटले आहे.

पुणे सत्र न्यायालयात सरकारी वकील उज्ज्वला पवार यांनी प्रधानमंत्री नरेंद्र मोदींना राजीव गांधी हत्याकांडासारखे आत्मघातकी हल्ल्यात संपविण्याचा कट असल्याचा ईमेल पोलिसांना मिळाला आहे अशी धक्कादायक माहिती दिली. ही माहिती मिळताच रामदास आठवले यांनी असा कट रचणाऱ्यांचा तीव्र निषेध व्यक्त केला आहे.