इस्रो करणार ८ देशांचे ३० उपग्रह प्रक्षेपित

नवी दिल्ली | भारतीय अवकाश संशोधन संस्था (इस्रो) ने आपल्या पोलर सॅटेलाइट लॉन्च व्हेइकल (पीएसएलव्ही) सी-४३ च्या मदतीने गुरुवारी सकाळी ८ देशांचे ३० उपग्रह अवकाशात सोडणार आहे. या ३० पैकी २३ उपग्रह अमेरिकेचे आहेत. अमेरिकेसह ऑस्ट्रेलिया, कॅनडा, कोलंबिया, फिनलँड, मलेशिया, नेदरलँड आणि स्पेन या ८ देशांचे हे उपग्रह असणार आहेत. या उपग्रहासह अवकाशात झेपावणाऱ्या ३० विदेशी उपग्रहांपैकी एक मायक्रो तर २९ नॅनो उपग्रह आहेत.

सतीश धवन अंतराळ केंद्रातून पीएसएलव्ही – सी ४३ च्या उड्डाणाचे काउंटडाऊन बुधवारी पहाटे ५.५८ वाजता सुरू झाले आहे. गुरुवारी सकाळी ९.५८ वाजता हे प्रक्षेपण होणार आहे. पीएसएलव्ही सी – ४३ मोहीमेचा हा प्राथमिक उपग्रह आहे. हा उपग्रह सूर्याच्या कक्षेत ९७.९५७ अंशात फिरणार असून ५ वर्ष कार्यरत राहणार आहे. सोबत भारताचा हायपरस्पेक्ट्रल इमेजिंग सॅटेलाइटदेखील अवकाशात झेपावणार आहे.