भीषण स्फोटात इमारत जमीनदोस्त, सात ठार

बेंगळुरू(वृत्तसंस्था): बंगळुरूमधील उपनगरातील इजीपुरा येथे सिलिंडरचा स्फोट होऊन रहिवासी इमारतीचा काही भाग कोसळल्यामुळे ७ जण ठार झाले. ही घटना आज (सोमवार) सकाळच्या सुमारास घडली. या घटनेत एक तीन वर्षीय मुलगी बचावली असून तिच्या आई-वडिलांचा मृत्यू झाला आहे. मोठ्या प्रयत्नानंतर ढिगाºयाखाली अडकलेल्या या मुलीला बाहेर काढण्यात अग्निशामक दलाला यश आले. यावेळी घटनास्थळी उपस्थित असलेले कर्नाटकचे मंत्री के जे जॉर्ज यांनी मुलीला राज्य सरकारने दत्तक घेतल्याचे घोषित करत तिचा सर्व खर्च करणार असल्याचे म्हटले. या घटनेतील जखमींचाही आकडा वाढू शकतो. दरम्यान, या घटनेस जबाबदार असलेल्यांवर कठोर कारवाई केली जाईल, असे मुख्यमंत्री सिद्धरामय्या यांनी म्हटले आहे.