अमित शहांच्या मुलांची संपत्ती १६ हजार पटींनी वाढली

नवी दिल्ली: भाजपचे पक्षाध्यक्ष अमित शहा यांचा मुलगा जय शहा यांच्या कंपनीच्या नफ्यात तब्बल १६ हजार पटींनी वाढ झाल्याचे निदर्शनास आले आहे. केंद्रात भाजपची सत्ता आल्यापासून शहा यांच्या संपत्तीत वाढ झाल्याने विरोधकांनी त्यांच्यावर कडाडून टीका केली आहे. हेच का ते अच्छे दिन म्हणत सोशल मीडियातून शहावर टीका होत आहे. न खॉउंगा न खाने दुंगा म्हणणारे पंतप्रधान यावर गप्प बसणार का असाही सवाल विरोधकांनी केला आहे. जय शहा संचालक असलेल्या टेम्पल एन्टरप्रायझेस प्रायव्हेट लिमिटेड या कंपनीने यंदाच्या वर्षी ८०.०५ कोटी रूपयांची आर्थिक उलाढाल केली आहे.

टेम्पल एन्टरप्रायझेस प्रायव्हेट लिमिटेडने स्वत:हूनच ही माहिती कंपनी नोंदणी कार्यालयाला दिली आहे. मात्र, कंपनीच्या गेल्यावर्षीच्या उलाढालीवर नजर टाकल्यास यामध्ये तब्बल १६,००० पटींना वाढ झाली आहे. परंतु, या कंपनीकडे कोणत्याही मालाचा साठा किंवा संपत्ती नसूनही त्यांनी इतका उत्कर्ष कसा साधला, असा सवाल कपिल सिब्बल यांनी उपस्थित केला. महत्त्वाची गोष्ट म्हणजे सत्ताबदल झाल्यानंतर हे सर्व घडले आहे. यालाच भांडवलदारांची कंपूशाही म्हणतात. आता पंतप्रधान सीबीआयला या सगळ्याची चौकशी करायला सांगणार आहेत का? जय शहा यांना अटक होईल का? पंतप्रधान शहा यांच्या मुलाची चौकशी करण्याचा प्रामाणिकपणा दाखवणार का?, असेही सिब्बल यांनी विचारले.