मुंबई | दिवंगत शिवसेना पक्षप्रमुख बाळासाहेब ठाकरे यांच्या स्मारकाला अखेर हिरवा कंदील मिळाला आहे. आता हे स्मारक महापौर बंगल्याऐवजी बंगल्याच्या तळघरात म्हणजेच अंडरग्राऊड बनविण्यात येणार आहे. त्यामुळे महापौर बंगल्यासारखी ऐतिहासिक वास्तू जैसे थे रहाणार आहे स्मारकासाठी या बंगल्याची कोणतीही तोडफोड किंवा येथील झाडांचीही कत्तल होणार नाही. पुरातत्व विभागाकडून ‘ब’ दर्जा मिळालेली ही वास्तू ऐतिहासिक आहे. त्यामुळे या वास्तूचे जतन करुन त्याचे पर्यटनात रुपांतर होईल. त्यासाठी शिवसेना पक्षप्रमुख उद्धव ठाकरेंनीच पुढाकार घेतला आहे.

महापौर बंगल्याची वास्तू २३०० स्वेअर फूट एवढी असल्यामुळे बाळासाहेबांचे स्मारक बांधण्यासाठी वास्तूची जागा अपुरी पडते. तर अंडरग्राऊंड परिसर हा तब्बल ९००० स्वेअर फूटांवर पसरलेला आहे. त्यामुळे स्मारकासाठी अंडरग्राऊंड परिसराचा पुरेपूर वापर होईल आणि बंगला परिसरातील लॉन्सही अबाधित राहिल.

महापौर बंगल्याविषयी थोडक्यात

मुंबईतील ऐतिहासिक वारसा असलेल्या इमारतींपैकी एक असलेला महापौर बंगला दादर चौपाटी लगत आहे. सन १९२८ साली हा बंगला बांधण्यात आला होता, त्यानंतर १९६२ साली मुंबई महापालिकेने हा बंगला विकत घेतला. तर डॉ. बी. पी. देवगी यांना महापौर म्हणून या बंगल्यात राहण्याचा पहिला मान मिळाला.

सन १९६४-६५ मध्ये या बंगल्याचा महापौरांसाठी अधिकृतपणे वापर करण्यात आला. बाळासाहेब ठाकरे ज्या शिवाजी पार्कमधून दसरा मेळाव्याला शिवसैनिकांना संबोधित करायचे, तेथून जवळच हा महापौर बंगला आहे. त्यामुळे बाळासाहेबांच्या स्मारकासाठी हेच ठिकाण उत्तम असल्याचे मुंबई ऐतिहासिक वारसा संवर्धन समितीने म्हटले आहे.