मुंबई । नाशिकमधील माजी मंत्री प्रशांत हिरे, माजी आमदार अपूर्व हिरे आणि अद्वैत हिरे यांच्यासह त्यांच्या हजारो समर्थकांनी राष्ट्रवादी काँग्रेस पक्षात जाहीर प्रवेश केला आहे. त्यांच्या जाहीर प्रवेशासाठी आज राष्ट्रीय अध्यक्ष शरद पवार पक्ष कार्यालयात आले होते. यावेळी शरद पवार यांनी हिरे कुटुंबियांचे पक्षात स्वागत केले. शिवाय नाशिक तसेच नाशिकच्या शेतकऱ्यांच्या कष्टाचे कौतुकही केले. भाऊसाहेब हिरे यांच्या नाशिकसाठी असलेल्या योगदानाबाबतही त्यांनी भाष्य केले. फळबागायतीमध्ये क्रांती केलेला हा नाशिक जिल्हा असल्याचे गौरवोदगारही यावेळी शरद पवार यांनी काढले.

“हिरे कुटंबियांची विचारधारा चांगली आहे. ते दुसऱ्या पक्षात गेले तो अपघात होता. त्या अपघातातून सावरुन त्यांनी त्यांची गाडी योग्य वळणावर आणली आहे. भुजबळांना बळ देण्यासाठी हे दोन तरुण आता उभे ठाकले असून आता सगळ्या क्षेत्रात नाशिकचा नावलौकिक वाढवण्यासाठी सर्वांनीच कामाला लागा आमची साथ कायम राहील”, असे आश्वासन शरद पवार यांनी यावेळी दिले. नाशिककरांनी नेहमीच शरद पवार यांच्या विचारांना साथ दिली आहे. नाशिककरांच्या कोणत्याही समस्यांची जाण सरकारला नाही. परंतु शरद पवार हे नेहमी शेतकऱ्यांच्या पाठीशी खंबीरपणे उभे राहिले आहेत”, असे प्रदेशाध्यक्ष जयंत पाटील यांनी म्हटले आहे.

माजी मंत्री प्रशांत हिरे,माजी आमदार अपूर्व हिरे आणि अद्वैत हिरे यांचे पक्षात प्रदेशाध्यक्ष जयंत पाटील यांनी स्वागत केले. या पक्ष प्रवेशामुळे नाशिकसह दिंडोरी मतदारसंघात राष्ट्रवादीची ताकद आणखी वाढणार आहे. यामुळे छगन भुजबळ यांना आणखी ताकदीने काम करता येणार असल्याचा विश्वासही प्रदेशाध्यक्ष जयंत पाटील यांनी व्यक्त केला.”हिरे कुटुंबियांशी काही काळ दुरावा निर्माण झाला होता. परंतु आता कोणताही दुरावा नाही. त्यांना नाशिकच्या राजकारणामध्ये मानाचे स्थान दिले जाईल”,असेही आमदार छगन भुजबळ यांनी म्हटले आहे.