मुंबई | भारतीय संविधानाचे शिल्पकार; महामानव डॉ बाबासाहेब आंबेडकर यांचे नाव मुंबई सेंट्रल रेल्वे टर्मिनस देण्यात यावे अशी मागणी रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी केली आहे. या मागणीसाठी लवकरच रेल्वे मंत्री पियुष गोयल आणि महाराष्ट्राचे मुख्यमंत्री देवेंद्र फडणवीस यांची भेट घेणार असल्याचे रामदास आठवले यांनी आज स्पष्ट केले.
महामानव डॉ बाबासाहेब आंबेडकर यांचे नाव मुंबई सेंट्रल रेल्वे टर्मिनस देण्यात यावे ही मागणी मागील 10 वर्षांपासून रिपब्लिकन पक्ष करीत आहे. महामानव डॉ बाबासाहेब आंबेडकरांची कर्मभूमी मुंबई राहिली आहे. मुंबईत त्यांचे वास्तव्य प्रदीर्घ काळ होते.त्यांनी उभारलेला मानवमुक्तीचा लढा मुंबईतुन त्यांनी लढविला. मुंबईत त्यांच्या अनेक आठवणी आहेत. त्यामुळे मुंबई सेंट्रल या पश्चिम रेल्वे वरील मोठया महत्वपूर्ण टर्मिनसला महामानव डॉ बाबासाहेब आंबेडकरांचे नाव देण्यात यावे अशी आंबेडकरी जनतेची अनेक वर्षांपासून मागणी आहे.
मुंबईत आंतरराष्ट्रीय विमानतळाला छत्रपती शिवाजी महाराजांचे नाव देण्यात आले आहे. तसेच मध्य रेल्वे च्या व्हिटी (व्हीक्टोरिया टर्मिनस) चे नाव बदलून छत्रपती शिवाजी महाराज टर्मिनस असे नामांतर करण्यात आले आहे. त्या नामांतराचे आंबेडकरी जनतेने स्वागत केले असून आम्हाला छत्रपती शिवाजी महाराज यांचे नाव आंतरराष्ट्रीय विमानतळ आणि मध्ये रेल्वे टर्मिनसला दिल्याबद्दल अभिमान वाटत आहे. त्याप्रमाणे मुंबई सेंट्रल रेल्वे टर्मिनसला महामानव डॉ बाबासाहेब आंबेडकर यांचे नाव देण्यात यावे अशी रिपब्लिकन पक्षाची मागणी आहे. ही मागणी मंजूर करून मुख्यमंत्र्यांनी मुंबई सेंट्रल टर्मिनसचे महामानव डॉ बाबासाहेब आंबेडकर रेल्वे टर्मिनस असे नामांतर करण्याचा ठराव राज्य सरकार तर्फे रेल्वे मंत्रालयाला त्वरीत पाठवावा. यासाठी आपण लवकरच मुख्यमंत्री देवेंद्र फडणवीस यांची भेट घेणार आहोत. त्याचप्रमाणे रेल्वे मंत्री पियुष गोयल यांचीही लवकरच भेट घेणार असल्याचे रामदास आठवले यांनी प्रसिद्धी माध्यमांना सांगितले आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
