बीड | बहिण पाण्यात बुडत असताना वाचवायला गेलेल्या भावाचा पाण्यात बुडून मृत्यू झाल्याची घटना बीड तालुक्यातील रामनगर शिवारातील पाझर तलाव येथे शनिवारी सकाळी ११ च्या सुमारास घडली आहे. पाण्यात पोहण्यासाठी गेलेल्या बहीण-भावाचा पाण्यात बुडून मृत्यू झाल्यामुळे परीसरात हळहळ व्यक्त होत आहे.

सुरज राजेश पवार (वय १५) व रंजना राजेश पवार (वय ८) रा. सात्रापोत्रा ता.बीड अशी मृत बहिण – भावाची नावे आहेत. रामनगर शिवारात या दोघांचे आई-वडील विहीरीवर कामास येत होते. त्यांच्याबरोबरच शनिवारी सुरज व रंजना आले असता नेहमीसारखे ते पोहण्यासाठी लगतच्या पाझर तलावाकडे गेले. सुरज याला पोहता येत होते तो बहीणीलाही पोहायला शिकवत होता. मात्र, तलावाच्या खड्ड्यातील पाण्याचा अंदाज न आल्याने रंजना ही बूडू लागली . तिने वाचविण्यासाठी आरडाओरड करताच सुरज तिला वाचविण्यासाठी गेला असता तिने त्याला घट्ट मिटी मारली त्यामुळे या दोघांचाही यावेळी बुडून मृत्यू झाला.

राजेश पवार यांना सुरज आणि रंजना ही दोनच मुले होती. मात्र, शनिवारच्या या दुर्घटनेत त्यांनी दोघांनाही एकाच वेळी गमावल्याने त्यांच्या भावनांचा बांध फुटला होता. दोघांचेही मृतदेह एकाच वाहनातून जिल्हा रुग्णालयात पाठविण्यात आले. हे दोघेही घटनास्थळीच मृत होऊन देखील आणखी एकदा तपासणी करण्याची विनवणी हे माता-पिता करीत होते. १५ वर्षाचा सुरज हा त्यांना विहीर खोदण्याच्या कामातही मदत करीत होता.