…तर बेस्ट कर्मचाऱ्यांना मनसे स्टाईलने मिळवून देणार न्याय !

मुंबई | “येत्या सोमवारपर्यंत (१४ जानेवारी) बेस्टच्या संपाचा तिढा सुटला नाही तर सोमवारपासून ‘महाराष्ट्र नवनिर्माण सेना’ आपल्या संपूर्ण ताकदीनिशी रस्त्यावर उतरून मनसे स्टाईलने आंदोलन करेल. याची सर्व जबाबदारी राज्य सरकार आणि बेस्ट प्रशासनाची असेल”,असा इशारा मनसेचे सरचिटणीस संदीप देशपांडे यांनी दिला आहे. मुंबईत गेल्या पाच दिवसांपासून बेस्ट कर्मचाऱ्याचा संप सुरू आहे. अनेक बैठकांनंतर देखील अद्याप यावर कोणताही तोडगा निघालेला नाही. मागण्या मान्य करत नाही तोपर्यंत आम्ही संप मागे घेणार नाही, अशी बेस्ट कर्मचाऱ्यांची ठाम भूमिका आहे.

आम्हाला मुंबईच्या जनतेला वेठीस धरायचे नाही. परंतु बेस्ट कर्मचाऱ्यांचे प्रलंबित प्रश्न मार्गी लागणे देखील महत्त्वाचे आहे, असेही संदीप देशपांडे यावेळी म्हणाले. काही दिवसांपूर्वी बेस्टचे शिष्टमंडळ मनसे अध्यक्ष राज ठाकरे यांची भेट घेण्यासाठी ‘कृष्णकुंज’वर दाखल झाले होते. यावेळी राज यांनी त्यांना एकजूट कायम ठेवण्याचा सल्ला दिला होता. त्याचप्रमाणे बेस्ट कर्मचाऱ्यांना आम्ही अखेरपर्यंत पाठिंबा असे म्हणत मनसेकडून पक्षाची अधिकृत भूमिका देखील स्पष्ट करण्यात आली होती.