मुंबई | शिवसेना पक्षप्रमुख उद्धव ठाकरे यांनी दस-या मेळाव्याच्या निमित्ताने मोदी सरकारवर निशाणा साधला आहे. यावेळी पाकिस्तान व सर्जिकल स्ट्राइक संदर्भात बोलताना केंद्र सरकारच्या धोरणावर देखील उद्धव यांनी टीका केली आहे. ते म्हणाले, सतत वल्लभभाई पटेलांचे नाव घेता. अहो मग तुम्ही काय करता, पाकिस्तानचे तुकडे करण्याऐवजी फक्त सोईचे राजकारण केले जात आहे. जर तेव्हा स्वातंत्र्यवीर सावरकर पंतप्रधान असते तर पाकिस्तान शिल्लकच राहिला नसता, असे वक्तव्य उद्धव ठाकरे यांनी यावेळी केले आहे.

राज्य दुष्काळाने होरपळत आहे. हीच परिस्थिती कर्नाटकमध्ये देखील असलेली पहायला मिळत आहे. महाराष्ट्रात केवळ दुष्काळावर चर्चा होत आहे पण तिकडे कर्नाटक सरकारने जुन्याच निकषाने दुष्काळ जाहीर केला. लवकरात लवकर दुष्काळ जाहीर केला नाही तर सरकारविरोधात रस्त्यावर उतरून आंदोलन छेडणार असल्याचेही यावेळी बोलताना उद्धव ठाकरे म्हणाले.