नवी दिल्ली। राम मंदिराचा मुद्दा देशभरात चांगलाच गाजत आहे. राम मंदिराच्या मुद्द्यावरून सर्वच पक्ष आणि हिंदू संघटना त्याविषयी भाष्य करत आहेत. परंतु दिल्लीचे उपमुख्यमंत्री मनीष सिसोदिया यांच्या याबाबतच्या वक्तव्यामुळे सर्वांचेच लक्ष वेधले गेले आहे. “अयोध्येतील वादग्रस्त जागेवर भव्य मंदिर उभारल्यानं रामराज्य येणार नाही. तर त्या जागेवर एक विद्यापीठ उभारण्यात यावे. शिक्षणानेच देशात रामराज्य येईल”, असे मनीष सिसोदिया म्हणाले आहेत.
मनीष सिसोदिया यांनी एका कार्यक्रमात बोलताना हा विचार मांडला. या कार्यक्रमात सिसोदिया यांना आम आदमी पार्टीची राम मंदिराबद्दलची भूमिका विचारण्यात आली. त्यावेळी त्यांनी विद्यापीठ उभारण्याची कल्पना मांडली. विद्यापीठात हिंदू, मुस्लिम, शीख, ख्रिश्चन आणि परदेशी असे सर्व प्रकारचे विद्यार्थी शिक्षण घेऊ शकतील, असेही मनीष सिसोदिया म्हणाले. या कार्यक्रमात बोलताना मनीष सिसोदिया यांनी जातीय राजकारण आणि शिक्षणावर भाष्य केले.
सध्या इतर देशांमध्ये काय सुरू आहे आणि आपल्याकडे नेमकं काय चाललं आहे. याचाही विचार व्हायला हवा, असेही मनीष सिसोदिया यांनी म्हटले आहे. ‘मी नुकताच जपानला गेलो होतो. तिथे हायड्रोजनवर चालणाऱ्या कारवर चर्चा सुरू होती. त्याचवेळी आपल्याकडे हनुमानाची जात कोणती, यावर राजकारण सुरू होते. हे खूपच निराशाजनक आहे. ही परिस्थिती केवळ शिक्षणामुळेच बदलू शकते,’ असा विश्वास त्यांनी व्यक्त केला आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
