मुंबई | गतवर्षी एलफिन्स्टन पुलावर झालेल्या चेंगराचेंगरीत २२ जणांना आपले प्राण गमवावे लागले. तर ३० जण जखमी झाले. या दुर्घटनेनंतर राज्य सरकारने भारतीय लष्कराच्या मदतीने नवीन पुल उभारला असून परळ आणि एलफिन्स्टनला जोडणारा नवीन पुलाचे काम देखील शेवटच्या टप्प्यात आले आहे.

गतवर्षी झालेल्या चेंगराचेंगरीची पुनवृत्ती होऊ नये म्हणून सरकारने नवीन प्लॅटफॉर्मची निर्मीती केली आहे. या प्लॅटफॉर्मला भारतीय लष्कराच्या मदतीने बांधलेला पुल जोडला असून अजून एक मोठा पर्यायी परळ आणि एलफिन्स्टन (प्रभा देवी) पुलाला जोडणा-या नवीन पुलाचे काम सुरु आहे. या पुलाचे काम शेवटच्या टप्प्यात आले आहे. या नवीन पुलामुळे जुन्या पुलावर होणारी गर्दी कमी होईल असे बोलले जात आहे.

जुना प्लॅटफॉर्म क्र.१ बंद

जुना प्लॅटफॉर्म क्र. १ बंद केला असून या प्लॅटफॉर्मवर लोखंडी जोडपुल बनविला आहे. हा पुल प्लॅटफॉर्मच्या उंचीचा बनविण्यात आला आहे. जेणे करुन प्लॉर्टफॉर्म क्र. २ वरील प्रवाश्याला सहज नवीन प्लॅटफॉम क्र.१वर पोहचने शक्य होईल.

परळ रेल्वे स्थानक हे वर्दळीचे स्थानक आहे. त्यामुळे या स्थानकात जास्त गर्दी दिसून येते. नवी प्लॅटफॉर्म बनविल्यामुळे आम्हाला प्रचंड आनंद होत आहे. परळ रेल्वे स्थानकात सकाळी ऑफिसला जाणा-यांची आणि सायंकाळी घरी जाणा-यांची प्रचंड गर्दी असते. या पुलामुळे आम्हा प्रवासांना प्रवास करणे सोपे झाले आहे अशी प्रतिक्रीया धवल सोळंखी या प्रवाशाने दिली.