अयोध्या | शिवसेना पक्षप्रमुख उद्धव ठाकरे यांनी यंदाच्या दसरा मेळाव्यात २५ नोव्हेंबरला अयोध्येच्या दौऱ्यावर जाण्याची घोषणा केली होती. त्याप्रमाणे आपल्या कुटुंबासह उद्धव ठाकरे अयोध्येसाठी रवाना झाले आहेत. दरम्यान, शिवसेनेचा अयोध्या दौरा आणि त्याच वेळी असणारी विश्व हिंदू परिषदेची धर्मसंसद यामुळे अयोध्येची सुरक्षा व्यवस्था मोठ्या प्रमाणावर वाढविण्यात आली आहे.

अयोध्येतील सुरक्षाव्यवस्थेसाठी अतिरिक्त पोलीस महासंचालक स्तराचे १ अधिकारी, १ उप-पोलीस महानिरीक्षक, ३ वरिष्ठ पोलीस अधीक्षक, १० अपर पोलीस अधीक्षक तर २१ क्षेत्राधिकारी, १६० पोलीस अधिकारी, ७० हवालदार, पीएसीच्या ४२ आणि आरएएफच्या ५ कंपन्या तैनात करण्यात आल्या आहेत, अशी माहिती येथील पोलीस प्रशासनाने दिली आहे. त्याचप्रमाणे अयोध्येत एटीएसचे कंमाडो आणि ड्रोन कॅमेरा, आरएएफ आणि दहशतवादविरोधी पथके तैनात करण्यात आली आहेत.

Visuals of security in Ayodhya. VHP and Shiv Sena will hold separate events in the city tomorrow over the matter of #RamTemple. pic.twitter.com/cD0PPn0GHI

— ANI UP/Uttarakhand (@ANINewsUP) November 24, 2018

दरम्यान नॅशनल हेराल्डने दिलेल्या वृत्तानुसार, अयोध्येतील सुमारे ३,५०० मुस्लिम नागरिकांनी भीतीपोटी शहरातून सुरक्षित स्थळी स्थलांतर केले आहे. शिवसेना हा पक्ष म्हणजे एक अत्यंत कट्टर आणि उग्र अशी संघटना आहे, असा अयोध्येतील जनतेचा समज आहे. शिवसेनेचा अयोध्या दौरा आणि त्याच दिवशी असलेली विश्व हिंदू परिषदेची धर्मसंसद यामुळे अयोध्येतील जनतेमध्ये विशेषतः मुस्लिम नागरिकांमध्ये मोठ्या प्रमाणावर भीतीचे वातावरण निर्माण झाले आहे.