बीड | शिवसेना पक्षप्रमुख उद्धव ठाकरे यांची बीडमध्ये सभा झाली. या सभेत बोलताना शिवसेना पक्षप्रमुख उद्धव ठाकरे यांनी आता बीडमध्ये भगवा फडकवायचा असल्याचे म्हणत पंकजा मुंडे यांना थेट इशाराच दिला आहे. मला शिवसेनेचा मुख्यमंत्री करायचा आहे, कारण मला राज्य उभारायचे आहे, असे यावेळी उद्धव ठाकरे म्हणाले आहेत. मागील विधानसभा निवडणुकीत बहिणीविरुद्ध उमेदवार देणार असे म्हणणाऱ्या उद्धव यांनी यंदा मात्र बीडमध्ये उमेदवार देणार असल्याचे स्पष्ट केले आहे.
गोपीनाथ मुंडेंसाठी आम्ही एक एक मतदारसंघ सोडला. परंतु आता मला बीडमध्ये सर्व जागांवर भगव्याचे राज्य पाहिजे, असे उद्धव ठाकरे यावेळी म्हणाले आहेत. उद्धव ठाकरे म्हणाले, महाराष्ट्रातील दुष्काळ जाहीर करायला मुहूर्त काढायचा काय ? असेच सुरु राहिले तर लोकशाही मार्गाने हे सरकार पुढे जाऊ शकेल असे वाटत नाही. देशात आणि राज्यात तब्बल ३० वर्षानंतर हिंदू सरकार आले आहे. परंतु लोकांच्या पदरी निराशाच पडली आहे. असे उद्धव ठाकरे म्हणाले आहेत.
दरम्यान, काल (सोमवारी) केंद्र आणि राज्यात सत्तेत राहून भाजपवरच टीका करणाऱ्या शिवसेनेला भाजपाध्यक्ष अमित शाह यांनी अल्टिमेटम दिले होते. त्यामुळे आता ‘सत्तेला कधीही लाथ मारू’ असे म्हणणाऱ्या उद्धव ठाकरेंना याबाबत आता अंतिम निर्णय घ्यावा लागणार आहे. एबीपी माझा या मराठी वृत्तवाहिनीने हे वृत्त प्रसारित केले होते. मात्र अमित शहा यांच्या या अल्टिमेटमवर उद्धव ठाकरे यांनी अद्याप भाष्य केलेले नाही.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
