बंगळूर | राजकारणात कधी काय होईल हे कोणीच सांगू शकत नाही. राजकीय पक्ष आवश्यकतेनुसार आपापल्या परिभाषा तयार करत असतात. कारण कर्नाटक भाजपचे प्रदेशाध्यक्ष बी.सी. येडियुरप्पा यांनी काँग्रेस नेते डी. शिवकुमार यांची भेट घेतली आहे. शिवकुमार यांच्या निवासस्थानी ही भेट झाली. भेटी दरम्यान येडियुरप्पा यांचे पुत्र बी.वाय.राघवेंद्रही उपस्थित होते. या भेटीमुळे कर्नाटकात राजकीय तर्क-वितर्कांना उधाण आले आहे.
या भेटीमुळे शिवकुमार भाजपमध्ये प्रवेश करणार ? कर्नाटकात सत्ता बदल होणार ? अशा अनेक शक्यता वर्तविल्या जात आहेत. दरम्यान, दुष्काळाच्या पार्श्वभूमीवर शिवामोगामधील सिंचन प्रकल्प मार्गी लावण्यासंदर्भात चर्चा झाली आहे. मतदारसंघातील प्रलंबित असलेले प्रकल्प मार्गी लावण्यासाठी मी निधी उपलब्ध करुन देण्याची मागणी केली आहे, असे येडियुरप्पा यांनी या बैठकीनंतर सांगितले आहे.
सिंचन प्रकल्पासाठी आपण दोन हजार कोटी रुपयांची मागणी केली असून आपल्याला सकारात्मक प्रतिसाद मिळाला आहे, असे राघवेंद्र यांनी सांगितले. वन खाते, सिंचन खात्याच्या अधिकाऱ्यांच्या उपस्थितीत दोन्ही नेत्यांमध्ये बोलणे झाले. त्यामुळे राजकीय चर्चेचा प्रश्नच येत नाही, असे येडियुरप्पा यांचे पुत्र बी.वाय.राघवेंद्र म्हणाले आहेत.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
