नॅशनल इन्स्टिट्युट ऑफ रुरल डेव्हलपमेंट ॲण्ड पंचायती राज ही स्वायत्त संस्था असून ती भारत सरकारच्या ग्राम विकास मंत्रालयाच्या अखत्यारित कार्यरत आहे. ग्रामीण विकासातील गुणवत्ता कार्यामुळे या संस्थेची ख्याती राष्ट्रीय व आंतरराष्ट्रीय पातळीवर पसरली आहे. ग्रामीण विकास क्षेत्रातील अधिकारी, लोकप्रतिनीधी, शिक्षण तज्‍ज्ञ आणि विद्यार्थी यांना आंतरशाखीय विषयातील प्रशिक्षण देणे, संशोधन करणे आणि सल्लामसलत करणे ही या संस्थेची उद्दिष्टे आहेत.
प्रारंभी 1958 मध्ये नॅशनल इन्स्टिट्युट कम्युनिटी डेव्हलपमेंट या नावाने ही संस्था स्थापन करण्यात आली होती. पुढे 1965 मध्ये संस्थेचे स्थलांतर हैद्राबाद येथील संकुलात करण्यात आले आणि 1977 मध्ये या संस्थेचे नॅशनल इन्स्टिट्युट ऑफ रुरल डेव्हलपमेंट असे नामकरण करण्यात आले आहे. हैद्रबाद पासून 15 किमी मधील राजेंद्रनगर येथे ही संस्था आहे. या संस्थेने 2008 साली सुवर्ण जयंती साजरी केली. गुवाहाटी, पटणा आणि जयपूर येथे या संस्थेची विभागीय केंद्रे आहेत.
या संस्थेने नुकतीच चौदाव्या पोस्ट ग्रॅज्युएट डिप्लोमा इन रुरल डेव्हलपमेंट या पूर्णवेळ निवासी एक वर्ष कालावधीच्या अभ्यासक्रमाच्या प्रवेशाची घोषणा केली आहे. या अभ्यासक्रमासाठी उमेदवार हे मान्यताप्राप्त विद्यापीठाचे पदवीधर असावेत. पदवी परीक्षेच्या अंतिम वर्षाला बसलेले उमेदवार देखील अर्ज करण्यास पात्र आहेत. अभ्यासक्रमाच्या प्रवेशासाठी उमेदवारांची लेखी परीक्षा, समूहचर्चा आणि व्यक्तिगत मुलाखत घेण्यात येईल. या आधारे उमेदवारांची अंतिम निवड होईल. लेखी परीक्षा दि. 28 मे, 2017 रोजी बंगळुर, भोपाळ, भुवनेश्वर, चेन्नई, दिमापूर, गुवाहाटी, हैद्राबाद, जयपूर, जम्मू, कोलकाता, लखनऊ, नवी दिल्ली, पटणा, पुणे आणि थिरुवंतपुरम या केंद्रांवर होईल. यापैकी कुठलेही केंद्र रद्द करण्याचा किंवा नवीन केंद्र स्थापन करण्याचा, उमेदवारांना ते बदलून देण्याचा अधिकार संस्था राखून ठेवत आहे. संस्थेत वसतिगृहाची आणि भोजनाची व्यवस्था उपलब्ध आहे. भारत सरकारच्या धोरणानुसार विविध संवर्गातील विद्यार्थ्यांसाठी आरक्षण उपलब्ध आहे. या अभ्यासक्रमाच्या प्रवेशासाठी अर्ज करण्याची अंतिम तारीख 25 मे, 2017 अशी आहे.
संस्थेच्या अधिक माहितीसाठी उमेदवारांनी कृपया संस्थेच्या www.nird.org.in/pgdrdm या संकेतस्थळास भेट द्यावी.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
