गरज असेल तरच बाहेर पडा, हवामान खात्याचे मुंबईकरांना आवाहन

मुंबई | सोमवारी मुंबईसह उपनगरात झालेल्या पावसानंतर अनेक ठिकाणी झाडे उन्माळून पडल्याच्या घटना घडल्या होत्या. अगदीच काही वेळ झालेल्या पावसाने मुंबईकर पुरते हैराण झाले होते. परंतु ८, ९ आणि १० जून रोजी मुंबईत मुसळधार पाऊस पडण्याची शक्यता असल्याचा अंदाज हवामान खात्याकडून वर्तविला आहे. तसेच गरज असेल तरच बाहेर पडा असे हवामान खात्याकडून मुंबईकरांना आवाहन करण्यात आले आहे.

अरबी समुद्रात कमी दाबाचा पट्टा तयार झाल्यामुळे २४ तासात दक्षिण कोकण आणि महाराष्ट्राच्या काही भागात मान्सून दाखल होण्याची शक्यता आहे, अशी माहिती हवामान विभागा कडून माहिती प्राप्त झाली आहे. तसेच ८,९ आणि १० तारखेला साडेचार मीटर पेक्षा कमी भरती असल्यामुळे धोका कमी असल्याचे हवामान विभागाकडून सांगण्यात आले आहे.

• मान्सून आधीच मुंबईची तुंबई

मुंबईसह उपनगरात काही भागात सोमवारी मुसळधार पावसाने हजेरी लावली. अर्ध्या तासाच्या मुसळधार पावसानंतर मुंबईतील हिंदमाता, मलबार हिल भागात पाणी साचले होते. ठाणे आणि नवी मुंबईतही विजांच्या कडकडाटासह पाऊस झाला. हवेत गारवा निर्माण झाल्याने अखेर उकाड्यापासून मुंबईकरांना दिलासा मिळाला आहे.