पालघर | दिवंगत खासदार चिंतामण वनगा यांच्या निधनानंतर पालघरमध्ये लोकसभा पोटनिवडणुक येत्या २८ मे रोजी होत आहे. या निवडणुकीत सर्वच पक्षांनी आपले अस्तित्व पणाला लावल्याचे पहायला मिळत. विषेश म्हणजे चिंतामण वनगा यांचे पुत्र श्रीनिवास वनगा यांनी शिवसेनेत प्रवेश केल्यामुळे पालघरमध्ये या पोटनिवडणुकीला विषेश रंगत आली आहे. त्यातच कॉंग्रेसचे राजेंद्र गावित यांनी भाजपात प्रवेश केल्यामुळे पालघर पोटनिवडणुकीत तगडी चुरस पहायला मिळणार आहे.

शिवसेनेने श्रीनिवास वनगा यांना या लोकसभा पोटनिवडणुत सीट दिल्यामुळे युवासेना प्रमुख आदित्य ठाकरेंसह शिवसेनेच्या अनेक वरीष्ठ नेत्यांनी वनगांच्या प्रचारात सहभाग घेतला होता. तसेच भाजपकडून महाराष्ट्राचे मुख्यमंत्री देवेंद्र फडणवीस यांनी गावितांच्या प्रचारासाठी सभा घेतली होती.

या निवडणुकीच्या पार्श्वभूमीवर उत्तर प्रदेशचे मुख्यमंत्री योगी आदित्यनाथ भाजपचे उमेदवार राजेंद्र गावित यांच्या प्रचारासाठी बुधवारी पालघर मध्ये उपस्थित रहाणार आहेत. बुधवारी सायंकाळी विरार पुर्व येथे सभा घेऊन ते मतदार आणि कार्यकर्त्यांना संबोधित करणार आहेत. सभेनंतर लगेचच योगी आदित्यनाथ दिल्लीला जायला निघणार असल्याची माहिती सुत्रांकडून मिळत आहे.