केन हार्व्हेस्टरला मोठी मागणी

पुणे : उस तोडणीची खर्च आवाक्याबाहेर जातो, त्यात मजुर मिळत नसल्याने ऊस उत्पादक शेतकऱ्यांनी सक्षम होण्याच्या दृष्टीने पाऊलं उचलण्यास सुरुवात केली आहे. राज्यातील सुमारे दोनशे शेतकऱ्यांनी दोनशे अब्ज रुपयांची गुंतवणूक करून उस तोडणी यंत्र खरेदी केले आहे.राज्यात यंदा किमान ९ लाख हेक्टरवरील ऊस तोडावा लागणार आहे. जादा उसामुळे तोडीसाठी हार्वेस्टरला मागणी वाढणार असून २३८ हार्वेस्टरचा वापर होण्याची शक्यता आहे. यात २०४ हार्वेस्टर शेतकऱ्यांचे तर सात हार्वेस्टर शेतकरी समूह गटाचे असतील. साखर कारखान्यांकडेदेखील हार्वेस्टरची संख्या वाढते आहे. स्वमालकीचे ४१ हार्वेस्टर आतापर्यंत साखर कारखान्यांनी वापरात आणले आहे. सर्वसाधारणपणे शक्तिमान कंपनीचा हार्वेस्टर ९० लाखाच्या पुढे तर जॉन डिअरच्या हार्वेस्टरची किंमत सव्वा कोटी रुपयांच्या पुढे आहे.

‘केवळ शेतकरीच नव्हे तर राज्यातील सात शेतकरी गट समूहदेखील ”केन हार्वेस्टिंग”मध्ये उतरले आहेत. या समूहांनी स्वतःचे हार्वेस्टर खरेदी करून उत्पन्न मिळवण्याचा उपक्रम सुरू केला आहे. दोन वर्षांपूर्वी १०० पेक्षा कमी शेतकऱ्यांकडे स्वतःचे केन हार्वेस्टर होते. आता २०४ शेतकऱ्यांनी हार्वेस्टर खरेदी केले आहेत. एका हार्वेस्टरसाठी एक कोटी रुपयांची गुंतवणूक असून भविष्यात ही गुंतवणूक अजून वाढेल, असे सूत्रांचे म्हणणे आहे.