नांदेड :- शेतकऱ्यांना विविध देशातील तंत्रज्ञान कळावे या उद्देशाने देशाबाहेरील शेती विषयक अभ्यास करण्यासाठी विदेश दौरा शासनाच्या वतीने नियोजन करण्यात येते. यासाठी इच्छूक शेतकऱ्यांनी गुरुवार ३१ ऑगस्ट २०१७ पर्यंत तालुका कृषि अधिकारी यांचेकडे अर्ज करावा, असे आवाहन जिल्हा अधीक्षक कृषि अधिकारी, नांदेड यांनी केले आहे.
कृषि विभागाच्यावतीने सन २०१७ – १८ या वर्षासाठी इस्त्राईल, जर्मनी / नेदरलँड आणि ऑस्ट्रोलिया या देशांत अभ्यास दौऱ्यांचे नियोजन केले आहे. या दौऱ्यात सहभागी होणाऱ्या शेतकऱ्यांना खर्चाच्या ५० टक्के किंवा जास्तीतजास्त एक लाख रुपये यापैकी जे कमी असेल ते अनुदान शासनाकडून दिले जाणार आहे. या दौऱ्याचा लाभ घेणाऱ्या शेतकऱ्यांकडे पासपोर्ट, विमा पॉलिसी, स्वत:चे नाव असलेला सात-बारा व नमुना आठ अ असणे आवश्यक आहे. प्रस्ताव सादरकर्ता अर्जदार हा २५ ते ६० वर्षे वयोगटातील शेतकरी असावा. त्यांचे उत्पन्नाचे मुख्य साधन हे शेती असावे. तसेच तो शासकीय, निमशासकीय, सहकारी संस्थेत नोकरीस, वैद्यकीय क्षेत्रातील डॉक्टर, वकील, सीए, अभियंता, कंत्राटदार आदी व्यवसायीक नसावा.
शेतकऱ्यांनी विहित प्रपत्रातील परिपुर्ण प्रस्ताव तालुका कृषि अधिकारी यांचेकडे सादर करावा. अधिक माहितीसाठी तालुका कृषि अधिकारी यांचेशी संपर्क साधावा, असेही आवाहन जिल्हा अधीक्षक कृषि अधिकारी नांदेड यांनी केले आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
