मुंबई | केंद्र सरकारने दिवाळीपूर्वी रेल्वे कर्मचाऱ्यांना खूशखबर दिली आहे. रेल्वे कर्मचाऱ्यांना दसरा आणि दिवाळीचा बोनस जाहीर झाला असून केंद्रीय मंत्रिमंडळाने रेल्वे कर्मचाऱ्यांना ७८ दिवसांचा पगार बोनस म्हणून देण्यास मंजुरी दिली आहे. या निर्णयामुळे लाखो कर्मचाऱ्यांना दिलासा मिळाला असून दसऱ्याच्या आधी बोनसची रक्कम खात्यात जमा व्हावी अशी त्यांची अपेक्षा आहे. मात्र रेल्वेमध्ये कार्यरत असलेल्या राजपत्रित अधिकाऱ्यांना या बोनसचा लाभ मिळणार नाही. केंद्रीय कॅबिनेटच्या बैठकीत मंगळवारी हा निर्णय घेण्यात आला आहे. या निर्णयामुळे रेल्वेवर २ हजार कोटी रुपयांचा अतिरिक्त बोजा पडणार आहे.
दरवर्षी दसऱ्याला रेल्वे कर्मचाऱ्यांना बोनस दिला जातो. मात्र त्यात राजपत्रित अधिकाऱ्यांचा समावेश केला जात नाही. तसेच रेल्वे प्रोटेक्शन फोर्स आणि रेल्वे प्रोटेक्शन स्पेशल फोर्स यांचा समावेश केला जात नाही. रेल्वेचे एकूण ११.३१ लाख कर्मचारी आहे. यातील अनेक कर्मचाऱ्यांचे मूळ वेतन ७ हजार रुपये आहे. त्यामुळे सुमारे १८ हजार रुपयांचा बोनस या कर्मचाऱ्यांच्या खात्यात जमा होऊ शकतो. २०११ पासून नवरात्री आणि दसऱ्याच्या वेळी रेल्वे हा बोनस देते आहे. सलग सातव्या वर्षी रेल्वेने आपल्या कर्मचाऱ्यांना ७८ दिवसांचा बोनस देण्याची घोषणा केली आहे, अशी माहिती मिळत आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
