मुंबई | दरवर्षी हजारो टन कचरा महासागरात वाहत असतो, त्यातील ६०% प्लास्टिक सामग्री आढळते. प्लास्टिक विशेषत: महासागरात दीर्घ काळ टिकते प्लास्टिक सागरी जीवनासाठी अतिशय घातक आहे. लाखो पक्षी, व्हेल आणि महासागरातील प्रचंड प्रमाणात मासे यामुळे मरतात. याचं विषयाचे गांभीर्य लक्षात घेता कोस्टल क्लीनअप डे दिवसाचे औचित्य साधुन अंघोळीची गोळी आणि कै. नारायण मेघाजी लोखंडे महाराष्ट्र श्रम विज्ञान संस्थेच्या संयुक्त विद्यमाने दादर चौपाटी परिसर युवकांनी स्वच्छ केला. पाण्यातील कचऱ्यामुळे वन्यजीव, मानव आणि समुद्रात काम करणाऱ्यांच्या जीवनावर परिणाम होतो.

यामुळे सागरी पर्यटन आणि मनोरंजनावरदेखील परिणाम होतात. अंघोळीची गोळी ही संस्था प्रेम, बंधुभाव, त्याग, बचत या आपल्या तत्वांच्या माध्यमाने गेल्या काही काळापासुन पाणी बचत आणि संवर्धन, खिळेमुक्त झाडं आणि प्लास्टिकच्या बदल्यात रोपटी देण्याचे अभिनव काम विविध शहरांत करत आहे. दिड दिवसांच्या गणेश विसर्जनानंतर चौपाटीवरील फुले, हार निर्माल्य आणि मोठ्या प्रमाणात प्लास्टिक यावेळी या युवकांनी जमा केले. किनारपट्टी आणि समुद्र स्वच्छतेची गरज आणि आवश्यकता यावर उपस्थितांना यावेळी जागृत करण्यात आले. यावेळी बीच प्लीज, क्रिसिल आणि युनायटेड वेया इतर संस्थांच्या तरुणांनी देखील आपला सहभाग नोंदवला.

प्लास्टीकचे समुच्चय नियोजन करण्यासाठी आणि किनारपट्टी व समुद्र स्वच्छतेसाठी सर्वांनी एकत्र काम करणे गरजेचे आहे असे यावेळी कै. नारायण मेघाजी लोखंडे महाराष्ट्र श्रम विज्ञान संस्थेच्या तेजश्री देवडकर या विद्यार्थिनीने सांगितले त्याचबरोबर यापुढे देखील आम्हीं महाविद्यालयाच्या वतीने सातत्यने हे काम करण्याचा प्रयत्न करू असे देखील त्यांनी यावेळी सांगितले. पर्यावरणाच्या प्रत्येक प्रश्नावर युवकांनी प्रत्यक्ष काम केले तरच आपण भविष्यात येणारे धोके टाळू शकतो यांसाठी प्रत्येकाने प्लास्टीकचा त्याग केला पाहिजे असे अंघोळीची गोळी संस्थेचे समन्वयक सागर वाळके यांनी यावेळी सांगितले.