नागपूर | राज्यात दुधाला प्रति लिटर ५ रुपये प्रमाणे अनुदान मिळावे यासाठी स्वाभिमानी शेतकरी संघटनेने आंदोलन सुरु केले होते. स्वाभिमानी शेतकरी संघटनेने केलेल्या या तीव्र आंदोलनाला अखेर यश आले आहे. गुरुवारी राज्य सरकारने दुधाला प्रतिलीटर २५ रुपये दर देण्याची घोषणा केली. या घोषणेमुळे स्वाभिमानी शेतकरी संघटनेने आपले आंदोलन मागे घेतले आहे. दूध दरवाढीचा हा निर्णय २१ जुलैपासून लागू होणार असून, दूध संघांना आता शेतक-यांना २५ रुपये प्रति लिटर प्रमाणे भाव द्यावा लागणार आहे. गुरुवारी दुग्धविकासमंत्री महादेव जानकर यांनी विधानसभेत व राज्यमंत्री अर्जुन खोतकर यांनी विधान परिषदेत तशी घोषणा देखील केली.
स्वाभिमानी शेतकरी संघटनेने राज्यात तब्बल ४ दिवस आंदोलन सुरुच ठेवले होते. दरम्यान अनेक ठिकाणी दुधाचे टँकर रोखण्यात आले. मात्र मुंबईसह मोठ्या शहरांमध्ये दूधटंचाई जाणवली नव्हती. या पार्श्वभूमीवर ‘स्वाभिमानी’चे संस्थापक खासदार राजू शेट्टी यांनी आंदोलन तीव्र करण्याचा इशारा दिला होता. त्याची दखल घेत विधानसभा अध्यक्ष हरिभाऊ बागडे यांच्या दालनात तातडीची बैठक होऊन हा निर्णय घेण्यात आला.
तुर्तास दुधाला दिलेली दर वाढ समाधानकारक आहे . तसेच जलसंपदा मंत्री गिरीश महाजन यांच्याशी बोलताना मी तीन-चार पर्याय दिले होते. त्यातील एक पर्याय सरकारने आज स्वीकारला आहे. त्यामुळेच आम्ही आंदोलन मागे घेत आहोत अशी प्रतिक्रीया प्रसार माध्यमांशी बोलताना स्वाभिमानी शेतकरी संघटनेचे अध्यक्ष खासदार राजू शेट्टी यांनी दिली आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
