वृत्तसंस्था( नवी दिल्ली) – तुम्ही एखाद्या खासगी कंपनीत नोकरी करत असाल आणि तुमचा पगार जर 12 हजार असेल तर त्याच्या बारशे पट तुमच्या सीईओचा पगार असोत. कदाचित आपल्याला हे ऐकून धक्का बसेल परंतु हे सत्य आहे. एका पाहणीत ही बाब लक्षात आली आहे. बड्या कंपन्यांचे मुख्य कार्यकारी अधिकारी (सीईओ) आणि मध्यम स्तरातील कर्मचारी यांच्या वेतनातील तफावत प्रचंड प्रमाणात असल्याचे या निमित्ताने स्पष्ट झाले आहे. शेअर बाजारात सुचिबद्ध असलेल्या ब्लू-चिप कंपन्यांच्या सीईओंचे वेतन हे या कंपन्यांच्या मध्यम स्तरीय कर्मचाऱ्यांचे वेतनापेक्षा तब्बल बाराशे पट अधिक असल्याचे या सर्वेक्षणात स्पष्ट झाले आहे.

भांडवल बाजार नियंत्रक सेबीच्या आदेशानुसार शेअर बाजारातील आघाडीच्या सूचिबद्ध कंपन्यांनी आपापल्या विविध स्तरांवरील कर्मचाऱ्यांना मिळणाऱ्या मोबदल्याची माहिती दिली. त्यातून वरील बाब स्पष्ट झाली आहे. या माहितीनुसार सीईओ, कार्यकारी अध्यक्ष यांना मिळणारा मोबदला प्रचंड प्रमाणात असून अनेक कंपन्यांनी या दोन्ही पदांचे मानधन २०१६-१७ या मागील आर्थिक वर्षात वाढवलेही आहे. त्या तुलनेत मध्यम स्तरावरील कर्मचाऱ्याचे वेतन मागील आर्थिक वर्षात वाढलेले नाही, तर या स्तराच्या तुलनेत सर्वोच्च स्तरावरील व्यक्तींचे वेतन कित्येक पटींनी अधिक आहे. मात्र त्याचवेळी सरकारी कंपन्यांच्या सीईओंचे वेतन हे मध्यम स्तरीय कर्मचाऱ्यांच्या केवळ तीन ते चार पटच अधिक असल्याचे स्पष्ट झाले आहे.