परळी | औष्णिक वीज निर्मितीमुळे भारताच्या नकाशावर ओळख असलेल्या परळी शहराची आता सौर ऊर्जा निर्मितीमुळे एक नवी ओळख निर्माण झाली आहे. भविष्यात या प्रकल्पामुळे या भागाच्या औद्योगिक विकासाला चालना मिळेल. तसेच या भागातील जनतेचे एम.आय.डी.सी. चे स्वप्न मीच पूर्ण करेन असा विश्वास विधान परिषद विरोधी पक्षनेते धनंजय मुंडे यांनी बोलून दाखवला आहे. २०१९ ला या भागाचा आमदार मीच असेल असेही त्यांनी स्पष्ट केले आहे.

परळी तालुक्यातील मलनाथपुर येथे ५०० कोटी रूपये खर्चुन उभारण्यात आलेल्या ८० मेगावॅट खाजगी सोलार पॉवर प्रकल्पाचे उदघाटन आज धनंजय मुंडे यांच्या हस्ते संपन्न झाले त्यावेळी ते बोलत होते. या प्रकल्पाचे उदघाटन माजी उपमुख्यमंत्री अजित पवार यांच्या हस्ते होणार होते मात्र हवामान बदलामुळे त्यांचा दौरा ऐनवेळी रद्द झाल्याने धनंजय मुंडे यांच्या हस्ते या प्रकल्पाचे उदघाटन करण्यात आले.