गडचिरोली – या नक्षलग्रस्त जिल्ह्यात पोलिसांकडून नक्षलींच्या विरोधात विशेष अभियान राबविण्यात येत आहे. या अभियानादरम्यान, नक्षलींच्या हल्ल्यात नव्हे, तर हृदयिवकाराच्या तीव्र धक्क्याने एका २४ वर्षिय पोलीस जवानाचा मृत्यू झाल्याची धक्कादायक घटना १९ ऑगस्ट रोजी घडली. आशिष बळवंत कुमरे (२४) असे या पोलीस जवानाचे नाव असून कुरखेडा पोलीस उपविभागाच्या मुख्यालयात गडचिरोली पोलिसांनी हवेत बंदुकीच्या फैरी झाडून त्याला मानवंदना दिली.

कुरखेडा पोलीस उपविभागांतर्गत शीघ्र प्रतिसाद पथक कोरची पोलीस ठाण्याच्या हद्दीत असलेल्या लक्ष्मीपूर जंगलात १९ ऑगस्ट रोजीच्या सायंकाळी साडेचारच्या सुमारास हा प्रकार घडला. घनदाट जंगलातील डोंगर उतरत असताना आशिष याला अचानक अस्वस्थ वाटून छातीत दुखू लागले. सहकाऱ्यांनी त्याच्यावर प्रथमोपचार करून त्याला कोरची येथील ग्रामीण रुग्णालयात दाखल केले. या वेळी वैद्यकीय अधिकाऱ्यांनी तपासणी करून त्यांना मृत घोषित केले.