जालनाः भाजपाचे प्रदेशाध्यक्ष रावसाहेब दानवे आपल्या बेताल वक्तव्यासाठी प्रसिद्ध आहे. फटकळ बोलून त्यांनी पक्षाला अनेकदा अडचणीत आणले आहेत. आता ते स्वतः एका प्रकरणामुळे अडचणीत आले आहेत. त्यांनी गेल्या साडेसात वर्षांपासून महावितरण कंपनीचे तब्बल अडीच लाखांची वीज बिल थकवले आहे. दानवेच्या भोकरदन येथील घराचे हे बिल आहे. सर्वसामान्य ग्राहकांचे दोन महिन्यांचे बिल थकल्यास त्यांचे कनेक्शन तोडले जाते. परंतु दानवेंच्या बाबतीत महावितरण कंपनीच्या अधिकाऱ्यांनी बोटचेपी भूमिका घेतल्याचे या प्रकरणावरून स्पष्ट होत आहे. दानवेंच्या दबावामुळे वीज पुरवठा खंडीत करण्यास अधिकारी धजावत नसल्याचेही बोलले जात आहे, रावसाहेब दानवे यांनी यापूर्वी शेतकऱ्यांविरोधात बेताल वक्तव्य करून वाढ ओढावून घेतला होता. त्यानंतर त्यांना माध्यमांशी किंवा सार्वजनिक ठिकाणी बोलताना जीभ सांभळण्याचा सल्ला पक्षातील दिग्गजांनी दिला होता. त्यामुळे दानवे गेल्या काही दिवसांपासून शांत होते. आता तर त्यांचे पद जाणार असल्याच्याही वावड्या उठल्या आहेत. त्यात वीज बिल थकवल्याचे प्रकरण बाहेर आल्याने दानवेंवर पुन्हा टीकेची झोड उठण्याची शक्यता आहे.