‘शिवाजीचे उदात्तीकरण’ पुस्तकावर भाजपच्या मागणीनंतर बंदी येणार ?

नागपूर | छत्रपती शिवाजी महाराजांची जयंती उद्या ( १९ फेब्रुवारी) आहे. त्यापूर्वी शिवाजी महाराजांवर आधारित ‘शिवाजीचे उदात्तीकरण पद्यामागचे वास्तव’ या पुस्तकावर बंदी घालण्याची मागणी भाजपचे प्रवक्ते शिवराय कुलकर्णी यांनी नागपुरात एक पत्रकार परिषद घेत मुख्यमंत्री उद्धव ठाकरे यांच्याकडे केली आहे. कुलकर्णींनी मुख्यमंत्र्यांना या पुस्तक बंदी करण्यासाठी पत्रही पाठवले होते.

या पुस्तकात शिवाजी महाराजांबद्दल आक्षेपार्ह आणि अपमानजनक लेखन करण्यात आले आहे. या पुस्तकाचे लेखन विनोद अनाव्रत यांनी केले असून पुस्तक प्रकाशित करणारे सुगावा प्रकाशक यांच्यावरही कठोर कारवाई करावी अशी मागणी त्यांनी पत्रातून केली आहे. या पुस्तकातील महाराजांवर लिहिण्यात आलेला मजकूर वाचताना अतिशय संताप होतो. या पुस्तकातील काही उतारे विशिष्ठ समुदायाचे लोक सोशल मीडियावर प्रसारित करत आहेत. दरम्यान, या पुस्तकातून छत्रपती शिवाजी महाराज, मराठा समाज यांच्याबद्दल आक्षेपार्ह लिखाण करत जनमानसात द्वेष निर्माण करणारे हे पुस्तक आहे, असे कुलकर्णींनी त्यांच्या पत्रात लिहिले आहे.

शिवाजीचे उदात्तीकरण या पुस्तकाचे शीर्षकही चुकीचे आहे. कारण त्यात महाराजांचा उल्लेख एकेरी केला आहे. दरम्यान, अशी अनेक कारणे देत भाजपने या पुस्तकावर बंदी घालावी, अशी मागणी केली आहे आणि या संबंधी अमरावती पोलीस ठाण्यात तक्रार दाखल करण्यात आली आहे.