मुंबई – मराठा समाजाला नुकतेच 16 % आरक्षण मिळाले असून त्यासाठी अनेकांचे जीव गेले आहेत. आरक्षणाच्या मागणीसाठी राज्यात मोठे आंदोलन उभारण्यात आले होते. यामध्ये ४२ जणांनी आत्महत्या केल्या. त्यामुळे या लोकांच्या कुटुंबातील एका सदस्याला एसटी महामंडळात नोकरी देण्याचा महत्त्वाचा निर्णय परिवहन विभागाकडून घेण्यात आला आहे. परिवहन मंत्री दिवाकर रावते यांनी याबाबतची घोषणा केली आहे. आंदोलनात सहभागी होत जीवाचे बलिदान देणाऱ्यांना सरकारकडून मदत करण्यात यावी अशी मागणी मराठा समाजाकडून वारंवार करण्यात येत होती. या मागणीचा विचार करुन भाजपा सरकारने हा महत्त्वपूर्ण निर्णय घेतला आहे.
आरक्षणासाठी आपला जीव दिल्याबद्दल कुटुंबियांना १५ लाखांची मदत द्यावी अशी मागणी राष्ट्रवादीचे नेते आणि विधीमंडळ पक्षनेते अजित पवार यांनी केली होती. कुटुंबातील कर्ती व्यक्ती गेली असल्यास एका सदस्याला सरकारी नोकरी देण्यात यावी अशीही मागणी त्यांनी केली होती. मात्र आर्थिक मदतीबाबतचा निर्णय अद्याप देण्यात आला नसून कुटुंबातील सदस्याला नोकरी देण्याची मागणी मान्य झाली आहे. त्यामुळे आत्महत्या केलेल्या व्यक्तीच्या कुटुंबियांना दिलासा मिळाला आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
