जळगाव । राष्ट्रवादीचे प्रदेशाध्यक्ष जयंत पाटील यांची ‘राष्ट्रवादी परिवार संवाद यात्रा’ सध्या सुरु आहे. याच पार्श्वभूमीवर, ११ फेब्रुवारी रोजी जळगावमध्ये होणाऱ्या जयंत पाटील यांच्या संवाद यात्रेसाठी राष्ट्रवादीचे नेते एकनाथ खडसे यांनी एक आढावा बैठक घेतली. यावेळी आपल्या कार्यकर्त्यांशी बोलताना खडसे यांनी विरोधी पक्षनेते देवेंद्र फडणवीस यांच्यावर निशाणा साधला आहे. “महाविकास आघाडी सरकार ५ वर्ष टिकणार असून विरोधकांना मी पुन्हा येईन, मी पुन्हा येईनच करत बसावे लागणार आहे”, अशा शब्दात एकनाथ खडसे यांनी देवेंद्र फडणवीस यांना अप्रत्यक्ष टोला लगावला आहे.
आपल्या कार्यकर्त्यांना संबोधित करताना एकनाथ खडसे म्हणाले, “राज्याचे राजकारण आता बदलत आहे. महाराष्ट्रामध्ये महाविकास आघाडी आपले पाय रोवत आहे. आपल्या कार्यकर्त्यांना थोपवून ठेवण्यासाठी विरोधक कितीही म्हणाले की हे सरकार पडणार आहे तरी हे सरकार टिकणार आहे, चालणार आहे”, असे एकनाथ खडसे म्हणाले.
खडसेंचा फडणवीसांना टोला
एकनाथ खडसेंनी यावेळी देवेंद्र फडणवीसांना देखील डिवचले आहे. “आपले कार्यकर्ते दुसऱ्या पक्षात जाऊ नयेत म्हणून काही गोष्ट कराव्या लागतात. कार्यकर्त्यांना थोपवून ठेवण्यासाठी अरे बाबा सरकार येणार आहे जाऊ नकोस, तुला महामंडळ देणार, समिती देणार आहे असे वारंवार सांगितले जाते. आता १ वर्ष पूर्ण झाले. अशीच ५ वर्ष निघून जातील आणि त्यांना मी पुन्हा येईन, मी पुन्हा येईनच म्हणत बसावे लागेल”, असा टोला खडसेंनी लगावला आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
