जळगाव | भाजपला राम-राम करत राष्ट्रवादी काँग्रेसमध्ये प्रवेश केल्यानंतर आज (२५ ऑक्टोबर) एकनाथ खडसे यांनी जळगावमधील राष्ट्रवादी काँग्रेसच्या कार्यालयाला भेट दिली. यावेळी राष्ट्रवादीच्या कार्यकर्त्यांकडून फटाक्यांची आतषबाजी करत त्यांचे जंगी स्वागत करण्यात आले. तसेच, राष्ट्रवादीच्या महिला कार्यकर्त्यांनी खडसे यांचं औक्षण करुन कार्यालयात स्वागत केलं. आज दसरा आहे. वाईट प्रवृत्तींवर चांगुलपणाने मात करण्याचा दिवस आहे. यापुढे आपणही समाजातील वाईट प्रवृत्तीविरोधात लढा द्यायचा आहे, असा संदेश खडसे यांनी आपल्या कार्यकर्त्यांना दिला आहे.
राष्ट्रवादी काँग्रेसच्या कार्यालयात प्रवेश करतानाच खडसे यांच्यावर फुलांची उधळण करण्यात आली. कार्यकर्त्यांनी फटाके फोडले. तर महिला राष्ट्रवादी काँग्रेसच्या कार्यकर्त्यांनी खडसे यांचं औक्षण केलं. खडसे पहिल्यांदाच राष्ट्रवादी काँग्रेसच्या कार्यालयात आल्यानं मोठ्या संख्येनं कार्यकर्ते जमले होते. यावेळी जोरदार घोषणाबाजीही करण्यात आली. सगळ्यांनी मिळून एकत्र काम केलं तर उत्तर महाराष्ट्रात राष्ट्रवादी काँग्रेस पक्ष एक नंबरचा पक्ष होण्यास उशीर लागणार नाही, असा विश्वासही खडसेंनी व्यक्त केला आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
