मुंबई | राष्ट्रवादीचे नेते एकनाथ खडसे यांनी महाराष्ट्र नवनिर्माण सेनेचे प्रमुख राज ठाकरे यांना वाढदिवसाच्या शुभेच्छा दिल्या आहेत. ट्विटरवर राज ठाकरे यांचा फोटो शेअर करत खडसेंनी त्यांना अभिष्टचिंतन केलं आहे. एकीकडे मुंबई महापालिका निवडणुकांच्या तोंडावर कोण कुठल्या पक्षासोबत युती-आघाडी करणार, याची उत्सुकता असताना खडसेंनी राज ठाकरेंना शुभेच्छा दिल्यामुळे सोशल मीडियावर चर्चा रंगली आहे. आज (१४ जून) राज ठाकरे यांचा वाढदिवस असून माझ्या वाढदिवशी मला कोणी भेटायला येऊ नका असं पत्र लिहून राज ठाकरेंनी मनसैनिकांना सांगितलं होतं.
एकनाथ खडसे यांचे ट्विट काय आहे?
“महाराष्ट्र नवनिर्माण सेनेचे संस्थापक अध्यक्ष श्री. राज ठाकरे जी… आज आपला जन्मदिवस. त्यानिमित्त आपले मनःपूर्वक अभिष्टचिंतन !” असे ट्विट राष्ट्रवादीचे दिग्गज नेते एकनाथ खडसे यांच्या ऑफिशिअल अकाऊण्टवरुन करण्यात आले आहे. सोबतच राज ठाकरेंचा खास फोटोही शेअर करण्यात आला आहे.
महाराष्ट्र नवनिर्माण सेनेचे संस्थापक अध्यक्ष श्री. @RajThackeray जी… आज आपला जन्मदिवस . त्यानिमित्त आपले मनःपूर्वक अभीष्टचिंतन ! pic.twitter.com/PJz8gYlhG6
— Eknath Khadse (@EknathGKhadse) June 14, 2021
राज ठाकरे यांच्या पत्रात काय?
“दरवर्षी माझ्या वाढदिवसाला आपण भेटतो.तुम्ही फार प्रेमाने अनेक ठिकाणाहून येता. मलाही तुम्हाला भेटल्यावर आनंद होतो आणि अंगात नवा उत्साह संचारतो, उर्जा मिळते. तशी उर्जा जाहीर सभेतही मिळते. पण तिथे तुम्ही नुसते दिसता, भेटत नाही. म्हणून माझ्या दृष्टीने वाढदिवसाचा दिवस तुमच्या सहवासात, तुम्हाला भेटल्याने खरा साजरा होतो. तुमच्या भेटीची मी वाट पाहात असतो. मात्र हेही वर्ष बिकट आहे. मागच्या वर्षीसारखंच. अजूनही कोरोनाने महाराष्ट्राला घातलेला विळखा सोडलेला नाही. लॉकडाऊन उठतो आहे. हळूहळू सगळं पूर्वपदावर यायला लागलं आहे. परंतु परिस्थिती अजूनही गंभीरच आहे. आजचंच पाहा, महाराष्ट्रात एका दिवसात काल 12,207 नवे रुग्ण सापडले आणि 1,64,743 जण आत्ताही उपचार घेत आहेत. अशा वातावरणात वाढदिवस वगैरे साजरा करणे मनाला पटत नाही. माझे सहकारी म्हणून तुम्ही हे नक्की समजून घ्याल.” असं पत्र राज ठाकरे यांनी शेअर केलं होतं.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
